Uyghur diyarida xususi karxanilar meblegh salghan tunji tömüryol liniyeside qatnash bashlan'ghan

Muxbirimiz erkin
2019-01-04
Élxet
Pikir
Share
Print

Uyghur aptonom rayonida xususi karxanilar meblegh sélip qurghan tunji tömüryol liniyeside 3‏-yanwardin bashlap resmiy qatnash bashlan'ghan.

Qumulning aratürk nahiyesidin gensuning xongchingxé poyiz békitige qeder qatnaydighan 435 kilométirliq mezkur tömüryol liniyeside mexsus kömür toshulidiken. "Shinjang géziti" ning xewer qilishiche, 3‏-yanwar küni 3700 tonna kömür bésilghan yük poyizi aratürkning nom dégen yéridin gensugha qarap yolgha chiqqan.

Xitay hökümiti 2010‏-yili 5‏-ayda chaqirghan "Shinjang xizmet yighini" din kéyin xitay xususi karxanilirining Uyghur rayonining istratégiyelik ul eslihelirige meblegh sélishigha yol qoyghan. Buning bilen gu'angxuy énérgiye hessidarliq cheklik shirkiti aratürk-xongchingxé tömür yol qurulushini höddige élip, mezkur qurulushqa 10 milyard 800 milyon yüen meblegh salghan. 435 Kilométirliq mezkur tömür yol qurulushida 2012‏-yili ish bashlan'ghan. Lékin bu siyaset eyni chaghda Uyghur kishilik hoquq teshkilatlirining qarshi turushigha uchrighan. Ular bu siyaset tebi'iy bayliqning bulang-talang qilinishi, köchmenlerning rayon'gha éqip éqip kirishi, mal bahasining örlishi, muhitning weyran bolushi, Uyghurlarning téximu qattiq yeklinishni keltürüp chiqiridighanliqini agahlandurghan idi.

Gu'angxuy guruhining ijra'iye diréktori shang jichyang "Shinjang géziti" ge bergen uchurida aratürk-xongchingxé tömür yoli "Shinjangning kömürini sherqqe yötkesh" ke türtke bolidighanliqini bildürgen. Uning ilgiri sürüshiche, mezkur tömüryol "Shinjangning kömüri" ni ichki mongghul, béyjing, tyenjin qatarliq aptonom rayon we sheherlirige yetküzüsh imkaniyitige ige qilidiken. Lékin Uyghur kishilik hoquq teshkilatliri xitay da'irilirining bir tereptin 3 milyondek Uyghurni yighiwélish lagérlirigha qamap, yene bir tereptin mezkur rayonning tebi'iy bayliqini keng kölemde échiwatqanliqi we nopus yötkewatqanliqini ilgiri sürmekte.

Toluq bet