Radiyomiz Uyghur bölümi muxbirliri a'ile-tawabi'atlirining tutqun'gha uchrighanliqi küchlük inkas qozghidi

Muxbirimiz irade
2018-03-01
Élxet
Pikir
Share
Print

Radiyomiz Uyghur bölümi muxbirliri a'ile-tawabi'atlirining tutqun'gha uchrighanliqi küchlük inkas qozghidi

Erkin asiya radiyosi Uyghur bölümi muxbirlirining bir qisim a'ile-tawabi'atlirining xitay da'iriliri teripidin tutqun qilin'ghanliqi heqqidiki xewer küchlük inkas peyda qildi.

Aldinqi küni "Washin'gton pochtisi" géziti radiyomiz Uyghur bölümi muxbirlirining biwasite uruq-tughqanlirining xitay da'iriliri teripidin tutqun qilin'ghanliqi heqqide bir parche mexsus xewer élan qilghan idi.

Bu xewer "Xelq'ara kechürüm teshkilati", "Xelq'ara muxbirlarni qoghdash komitéti" qatarliq organlarningmu küchlük diqqitini qozghidi. Ular bu heqte arqa-arqidin bayanat élan qildi. "Xelq'ara kechürüm teshkilati" bayanatida, muxbirimiz gülchéhrening yashinip qalghan ata-anisidin xewer alalmaywatqanliqi we uning 20 din oshuq uruq-tughqinining tutqun qilin'ghanliqini alahide tilgha alghan.

Bügün yene, amérikidiki birleshme agéntliqi, roytérs agéntliqi we "Zaman" géziti qatarliqlarmu bu mesile heqqide keng xewer berdi. Mezkur xewerlerde erkin asiya radiyosi Uyghur bölümidiki muxbirlarning biwasite a'ile-ezaliridin birmunche kishining tutqunda ikenliki we buninggha ularning Uyghur diyari heqqide ishlewatqan xewerlirining seweb bolghanliqi bayan qilin'ghan.

Emma xitay tashqi ishlar ministirliqining bayanatchisi lu kang béyjingdiki muxbirlarni kütüwélish yighinida muxbirlarning bu heqtiki so'aligha jawab bérip mundaq dégen: "Méning bu ehwaldin xewirim yoq. Emma silergimu ayan bolghandek, biz her waqit chet'el muxbirlirining xitay toghriliq adil we toghra xewer bérishini qarshi élip kelduq."

Melum bolushiche, erkin asiya radiyosi Uyghur bölümining eng az dégende 5 neper xadimining Uyghur diyaridiki uruq-tughqanliri tutqanda iken.

Toluq bet