Uyghur diyaridiki wirusning lagérlargha tarqilishi endishe qozghimaqta

Muxbirimiz eziz
2020-02-20
Élxet
Pikir
Share
Print

Xitayning wuxen shehiridin tarqalghan tajsiman wirusning Uyghur diyaridiki yuqum ehwali nöwette barghanséri éship bériwatqan bolup, xitay hökümiti izchil bu wirusning tarqilishini kontrol qilghili bolidighanliqini tekitlep kelmekte.

Ürümchi da'iriliri bolsa hazir tajsiman wirustin yuqumlan'ghan bir qisim bimarlarning dawalinip saqayghanliqi hemde doxturxanidin chiqip, öylirige qaytqanliqini xewer qilmaqta.

19-Féwral küni kanada parlaméntining ezasi, kanada yéshillar partiyesining rehbiri élzabét méy mexsus söz qilip, özining héchqandaq metbu'at erkinlikige ige bolmighan lagér tutqunliridin hazir téximu zor endishide boluwatqanliqini bildürdi.

"Yer shari xewerliri" ning 20-féwraldiki sin höjjitide körsitilishiche, u hazir Uyghurlarning eng xeterlik basquchta turuwatqanliqini tekitlep: "Tajsiman wirus kanadada zor ölüm-yitim weqelirige seweb bolghini yoq. Chünki kanadada mukemmel tébbiy sistéma buninggha teyyar turmaqta. Emma xitaydiki Uyghurlarning ehwali bundaq emes," dédi.

Élzabit nöwette Uyghurlar milyonlap qamiliwatqan lagérlarning maddiy shara'itining bekmu nachar ikenlikini, buning zor bir xeterge yol échiwatqanliqi, bolupmu nechche onlighan kishi bir öyge qamap qoyulushtek ehwalning tajsiman wirusning tarqilishigha keng yochuq échip béridighanliqini, yene kélip bu lagérlarda zörür bolghan, haman érishkili bolidighan tébbiy dawalashning mewjut emeslikini sözlep ötti. Shundaqla xitay hökümiti hazirgha qeder wabaning heqiqiy ehwalini yoshurup kéliwatqanliqi üchün lagérlardiki Uyghur tutqunlarning amanliqi toghrisida uchur yoqluqini, lagérlarda wirusqa qarshi qandaq tedbirlerning élin'ghanliqi toghrisidimu tashqi dunyaning héchnersidin xewersiz ikenlikini bildürdi. U axirida xitay hökümitige tajsiman wirus mislisiz wehime peyda qiliwatqan bügünkidek peytte lagérlardiki Uyghur tutqunlar duch kéliwatqan xéyim-xeterge diqqet qoyushqa alahide chaqiriq qildi.

Toluq bet