Уйғур аптоном районида чәтәлдин киргән хитай вә чәтәл пуқралири 14 күн карантинға елиниду

Мухбиримиз әркин
2020-03-20
Share

Хитай даирилири 18-март күни уқтуруш чүшүрүп, уйғур аптоном райониға чәтәлдин киргән хитай вә чәтәл пуқралириниң 14 күн карантинға елинидиғанлиқини елан қилған.

Уйғур аптоном районлуқ таҗсиман өпкә яллуғи вирусидин мудапиә көрүш қоманданлиқ штаби елан қилған мәзкур уқтуруш 19-март күни таң сәһәрдин башлап иҗра қилинишқа башлиған. Уқтурушта қәйт қилинишичә, мәзкур районға мәйли чәтәлдин биваситә киргән яки ичкири өлкиләр арқилиқ васитилик киргән хитай вә чәтәл пуқралири болсун 14 күн мәркәзләштүрүлүп карантинға елинидикән.

Уқтурушта, бу хил кишиләрниң дәрһал айродром вә пойиз истансилиридики тәкшүрүш орунлириға яки иҗтимаий район хадимлириға өзини мәлум қилиши тәләп қилинған. Хитайниң вухән шәһиридә корона вируси партлиғандин кейин уйғур аптоном райони даирилири районда 76 юқумдар байқалғанлиқи, уларниң 3 ниң өлгәнликини елан қилған.

Лекин даириләрниң шәһәр-йезиларни қамал қилип, юқумға даир учурларни қаттиқ контрол қилиши, шундақла қисқа вақит ичидә юқумдарларниң сақайғанлиқи, юқумниң пүтүнләй алди елинғанлиқини елан қилиши юқумниң һәқиқий әһвалиға қарита һәр хил гуманларни қозғиғаниди.

Болупму униң карантин тәдбирлири толуқ бикар қилинмай туруп уйғур ишләмчиләрни кәң көләмдә йөткиши бу җәһәттики әндишә вә гуманларни техиму күчәйткәниди. "шинҗаң гезити" ниң хәвәр қилишичә, нөвәттә райондики санаәт карханилириниң 99.3% И ишләпчиқиришни әслигә кәлтүрүп болған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт