B d t kishilik hoquq aliy komissari Uyghur élide ziyarette bolghan bir waqitta korona wirusi qayta yamrashqa bashlighan

Muxbirimiz erkin
2022.05.27
Share on WhatsApp
Share on WhatsApp

B d t kishilik hoquq aliy komissari mishél bachélét Uyghur élide ziyarette bolidighan bir waqitta xitay da'iriliri Uyghur élide korona wirusi yuqumining qayta yamrashqa bashlighanliqini élan qilghan. Xitay hökümiti bachélétning 23-may küni bashlan'ghan we Uyghurlar mesilisi uning ziyaritining asasliq küntertipini teshkil qilghan xitay ziyaritige qarita korono wirusi karantin tedbirlirining kücheytilidighanliqi, muxbirlarning uninggha hemrah bolushigha yol qoyulmaydighanliqini éytqan.

Bachélétning xitay ziyariti bashlan'ghan peytte, “Shinjang saqchi höjjetliri” namliq xitayning lagérlardiki wehshiyliklirige a'it mexpiy höjjetliri ashkarilinip, uning ziyariti dunyaning téximu diqqet nuqtisigha aylan'ghanidi.

“Tengritagh” torining xewer qilishiche, Uyghur aptonom rayonluq sehiye komitéti 26-may rayonda 8 neper késellik alamiti yoq yuqumdar bayqalghanliqini élan qilghan. Buning bilen rayonda késellik alamiti yoq yuqumdarlarning omumiy sani 16 ge yetken. Aptonom rayonluq sehiye komitétining éytishiche, qiziq yéri késellik alamiti yoq 16 neper yuqumdarning hemmisi ‍ürümchining Uyghurlar topliship olturaqlash “Tengritagh” rayonidin balqalghaniken. Yene bir nuqta, da'im “Shinjang ishlepchiqirish qurulush bingtu'eni” diki yuqum ehwalini teng tilgha alidighan aptonom rayonluq sehiye komitéti, bu qétim bingtüenni tilgha almighan.

Uyghur aptonom rayonluq sehiye komitétining éytishiche, nöwette ürümchining “Tengritagh” rayonidin bayqalghan 16 neper késellik alamiti yoq yuqumdarning hemmisige qarita tébbiy karantin tedbirliri élin'ghan. Da'iriler 26-may élan qilghan uchurida yene hazirgha qeder késellik alamiti bar héchqandaq bir yuqumdar bayqalmighanliqi, nöwette bu xil yuqumdarlarning nöl ikenlikini éytqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.