Uyghur diyarida 6-awghust küni yene 26 neper korona wirusi yéngi yuqumdari bayqalghan

Muxbirimiz erkin
2020.08.07

Uyghur diyarida korona wirusi yuqumdarliri her küni ikki xaniliq san bilen köpeymekte. Da'iriler yuqumdarlarning hemmisining ürümchide bayqiliwatqanliqini ilgiri sürsimu, lékin uning ghulja qatarliq jaylarda alghan qattiq karantin tedbirliri közetküchilerde hökümet bu jaylardiki yuqumni yoshuruwatamdu qandaq, dégen gumanni qozghap keldi. Xitay sehiye tarmaqlirining ashkarilishiche, 6-awghust küni Uyghur rayoni miqyasida yene 26 neper yéngi yuqumdar bayqalghan. Yéngi bayqalghan yuqumdarlarning hemmisi ürümchi iken.

Da'iriler buning aldida, yeni 5-iyul küni rayonda 27 neper yuqumdar bayqalghanliqi, ularningmu hemmisining ürümchide ikenlikini élan qilghan idi. Uyghur aptonom rayonluq sehiye komitétining 7-iyul élan qilishiche, 6-iyul küni rayonda bayqalghan resmiy yuqumdarlarning sani 643 ke yétip barghan. Shu küni rayon miqyasida bayqalghan gumanliq yuqumdarlar 128 neper iken. Nöwette Uyghur diyari xitaydiki eng éghir yuqum rayonigha aylan'ghan.

Melum bolushiche, 6-awghust xitay miqyasida bayqalghan omumiy yuqumdarlarning 60% din köprekini Uyghur diyaridikiler teshkil qilghan. Xitay döletlik sehiye komitéti jüme küni élan qilghan uchurida, 6-awghust küni xitay miqyasida 37 neper yuqumdar bayqalghanliqini bildürgen. Uyghur aptonom rayonluq sehiye komitétining bildürüshiche, nöwette pütkül rayon miqyasida 19 ming 546 neper kishi tébbiy karantin astida tutup turulmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.