Uyghur rayonida yuqumning omumyüzlük yamrawatqanliqi melum bolmaqta

Muxbirimiz jewlan
2022.08.08
Share on WhatsApp
Share on WhatsApp

Xitay taratqulirining xewirige qarighanda, 8-awghust künigiche késellik alamiti yoq yuqumning ili oblastidin bashqa yene chöchek, qeshqer, bortala, aqsu, qomul, ürümchi qatarliq 7 wilayet (oblast, sheher) we 12 nahiye (sheher, rayon) ge yamrighanliqi, yuqumdarlarning 274 neperge yetkenliki melum qilin'ghan؛ bu téxi bingtu'endiki yuqum sanini öz ichige almaydiken.

Ili oblastida yuqumdarlar eng köp bolup, ghulja shehiride 219, ghulja nahiyeside 33, nilqa nahiyeside 4, tarbaghatay wilayitining sawen shehiride 2, bortala shehiride 2, aqsu shehiride 2, qomul shehiride 1, ürümchi shehiride 4 yuqumdar bayqalghan.

8-Awghust küni Uyghur aptonom rayonluq hökümet axbarat ishxanisi yuqum ehwalidin melumat bérish yighini chaqirghan, yighinda aptonom rayonluq sehiye-saqliqni saqlash komitétining mu'awin mudiri süy yen her qaysi jaylardiki yuqum ehwaligha qarap ularni “Yuqum xetiri éghir, otturahal, yenggil” dep üch rayon'gha ayrighanliqini bildürgen. Ili oblasti, aqsu, qeshqer wilayetliri we ürümchi shehiridiki 45 rayon “Xeterlik rayon” dep békitilgen؛ yene mezkur oblast we wilayetlerdiki 34 rayon “Otturahal rayon”, 9 rayon “Yenggil rayon” dep békitilgen.

Uyghur aptonom rayonluq partkomning sékritari ma shingrüy yene kéngeytilgen yighin chaqirip, sehiye-saqliqni saqlash komitétining “Üch rayon'gha bölüsh” xizmet doklatini anglighan hemde pütün rayon'gha yamrawatqan bu yéngi tiptiki tajisiman wirusni “Ilmiy usul, yuqiri ünüm” bilen bir terep qilishni telep qilghan.

Uyghur rayonining sayahetchilikini güllendürüshni teshwiq qiliwatqan xitay hökümiti hazir buninggha tosqunluq qiliwatqan yuqum weziyitini qandaq kontrol qilishning koyigha chüshken. Yuqum weziyiti éghir dep békitilgen rayonlardiki xelqni “Öyge solap béqish” tedbirliri shangxey qatarliq sheherlerdikige oxshash késellik, acharchiliq we ölümge yol échishi mumkinliki endishe yaratmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.