Уйғур дияридики юқум әһвали җиддий өрлимәктә

Мухбиримиз әзиз
2022.08.09
Share on WhatsApp
Share on WhatsApp

Уйғур диярида йеңиваштин ямраватқан таҗсиман вируси йеқиндин буян изчил өрләш һалитидә туруп келиватқан болуп, 8-авғусттики әң йеңи статистикилиқ мәлуматта көрситилишичә, йеңидин 146 нәпәр аламәтсиз юқумдар байқалған. Әмма мушу мәзгилгичә болған арилиқта уйғур дияридики ениқ диагноз қоюлған юқумдарлар сани 274 кә йәткән болуп, бу сан изчил ешип маңмақтикән.

Хитай һөкүмити башқурушидики “тәңритағ тори” ниң 8-авғусттики хәвиридә ейтилишичә, 30-июлдин башлап или районида ямрап кетиватқан таҗсиман вируси юқуми тездин чөчәк, қәшқәр, ақсу, қумул, үрүмчи қатарлиқ җайларғичә тарқалған. Әмма хәвәрдә көрситилишичә, бу юқумдарларниң һәммисила аламәтсиз һалда болуп, буниң башқиларға юқуш еһтималлиқи бирқәдәр юғури болидикән.

Хәвәрдә таҗсиман вирусиниң йеңидин ямрап кетиши дәрһалла чәтәлгә бағланған һәмдә или районидики вирусниң мәнбәси чәтәл икәнлики тәкитләнгән. Бу һал әйни вақитта хитай һөкүмитиниң “америка тәнһәрикәтчилири таҗсиман вирусини вухәнгә елип кәлгән. Шуниң билән бу вирус вухәндә ямрап кәткән” дәп җакарлиған баянатиға охшап кетидикән. Әмма радийомизниң 9-авғусттики әһвал ениқлиши давамида ғулҗа тәвәсидики юқумдарларға таҗсиман вирусини юқтурғучиларниң гәнсудин кәлгән хитай саяһәтчиләр икәнлики дәлилләнгәниди.

Хәвәрләрдин мәлум болушичә, хитай даирилири һәр қайси җайлардики юқум әһвалиға қарап уларни “юқум хәтири еғир, оттураһал, йәңгил” дәп үч районға айриғанлиқини билдүргән. Или области, ақсу, қәшқәр вилайәтлири вә үрүмчи шәһиридики 45 район “хәтәрлик район” дәп бекитилгән; йәнә мәзкур област вә вилайәтләрдики 34 район “оттураһал район”, 9 район “йәңгил район” дәп бекитилгән.

Һалбуки хитай һөкүмити һазирға қәдәр уйғур дияридики “вирусни нөлгә чүшүрүш” тәдбири қатарида қаттиқ қоллуқ билән иҗра қиливатқан қамал чарилириниң хәлқ аммисиға қандақ қулайсизлиқларни елип келиватқанлиқи, вирус юқуминиң лагерлардики тарқилиши қатарлиқ дуня хәлқи көңүл бөлүватқан мәсилиләр тоғрисида һечқандақ мәлумат берип баққини йоқ. Болупму хитай һөкүмитиниң таҗсиман вирусиға даир учурларни “дөләт мәхпийити” қатарида сир тутуши һәмдә уларниң бу мәсилидә изчил сахта мәлумат елан қилиши түпәйлидин уйғур дияридики юқумниң һәқиқий әһвали йәнила намәлум һалда туруп кәлмәктикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.