Хитай корона вируси юқуми астидики уйғур диярида уйғур әмгәк күчлирини йәнила ишләшкә мәҗбурлимақта икән

Мухбиримиз әркин
2020-08-11
Елхәт
Пикир
Share
Принт

Корона вируси уйғур диярида қайта тарқилип, хитайдики әң еғир юқум райониға айланған вә нурғун җайлар қамал қилинған болсиму, лекин хитайниң уйғур ишчилирини йәнила завут-карханиларда ишләшкә кәң көләмлик тәшкилләватқанлиқи илгири сүрүлмәктә.

Әнглийә «експрәс» гезитиниң 10-авғуст хәвәр қилишичә, хитай иҗтимаий алақә юмтали-тиктоктики ведийолар хитайниң карантин астидики уйғур диярида уйғур әмгәк күчлирини ишләшкә мәҗбурлаватқанлиқини ашкарилап бәргән.

Хәвәрдә бу ведийоларда сериқ вә көк чапанлиқ нурғун уйғур ишчилириниң аптобус вә айродромлардики көрүнүши барлиқи, бу ведийоларниң «шинҗаң хитайдики корона вируси юқуминиң әң қаттиқ изтирапини чекиватқан мәзгилдә тарқалғанлиқи», һалбуки үрүмчи шәһириниң қамал қилинип, һава қатниши асасән тохтиғанлиқи, пуқраларниң талаға чиқиши чәклинип, аммиви қатнашниң тохтиғанлиқи тәкитләнгән. Нөвәттә хитай һөкүмити районда юқумниң контрол қилинип, юқумдарларниң азийиватқанлиқи, хәлқниң һәқсиз давалиниватқанлиқини илгири сүрсиму, лекин көзәткүчиләр униң санлиқ мәлуматиға гуман билән қарап кәлди.

Уйғур аптоном районлуқ сәһийә комитетиниң 11-июл тәкитлишичә, 10-июл күнигичилик районда 13 нәпәр йәң юқумдар байқалған болуп, юқумдарларниң һәммиси үрүмчидә икән. Мәзкур органниң учурида район миқясида шу күндики омумий юқумдарларниң 567 нәпәр икәнлики, 15658 нәпәр кишиниң карантин астида икәнлики тәкитләнгән. Бирақ кишилик һоқуқ тәшкилатлириниң тәкитлишичә, лагердики тутқунлар вә завут карханиларда мәҗбурий әмгәккә селиниватқан уйғур ишчилириниң әһвали уларни әндишигә салмақта икән.

Пикирләр (0)
Share
Толуқ бәт