Xitay korona wirusi yuqumi astidiki Uyghur diyarida Uyghur emgek küchlirini yenila ishleshke mejburlimaqta iken

Muxbirimiz erkin
2020-08-11
Élxet
Pikir
Share
Print

Korona wirusi Uyghur diyarida qayta tarqilip, xitaydiki eng éghir yuqum rayonigha aylan'ghan we nurghun jaylar qamal qilin'ghan bolsimu, lékin xitayning Uyghur ishchilirini yenila zawut-karxanilarda ishleshke keng kölemlik teshkillewatqanliqi ilgiri sürülmekte.

En'gliye "Ékspres" gézitining 10-awghust xewer qilishiche, xitay ijtima'iy alaqe yumtali-tiktoktiki wédiyolar xitayning karantin astidiki Uyghur diyarida Uyghur emgek küchlirini ishleshke mejburlawatqanliqini ashkarilap bergen.

Xewerde bu wédiyolarda sériq we kök chapanliq nurghun Uyghur ishchilirining aptobus we ayrodromlardiki körünüshi barliqi, bu wédiyolarning "Shinjang xitaydiki korona wirusi yuqumining eng qattiq iztirapini chékiwatqan mezgilde tarqalghanliqi", halbuki ürümchi shehirining qamal qilinip, hawa qatnishi asasen toxtighanliqi, puqralarning talagha chiqishi cheklinip, ammiwi qatnashning toxtighanliqi tekitlen'gen. Nöwette xitay hökümiti rayonda yuqumning kontrol qilinip, yuqumdarlarning aziyiwatqanliqi, xelqning heqsiz dawaliniwatqanliqini ilgiri sürsimu, lékin közetküchiler uning sanliq melumatigha guman bilen qarap keldi.

Uyghur aptonom rayonluq sehiye komitétining 11-iyul tekitlishiche, 10-iyul künigichilik rayonda 13 neper yeng yuqumdar bayqalghan bolup, yuqumdarlarning hemmisi ürümchide iken. Mezkur organning uchurida rayon miqyasida shu kündiki omumiy yuqumdarlarning 567 neper ikenliki, 15658 neper kishining karantin astida ikenliki tekitlen'gen. Biraq kishilik hoquq teshkilatlirining tekitlishiche, lagérdiki tutqunlar we zawut karxanilarda mejburiy emgekke séliniwatqan Uyghur ishchilirining ehwali ularni endishige salmaqta iken.

Toluq bet