9-Awghust Uyghur rayonida yéngidin korona wirusi bilen yuqumlan'ghan 21 neper yuqumdar bayqalghan

Ötken aydin bashlap Uyghur rayonida korona wirusi qayta yamrighan bolup, ürümchi shehiridiki yuqumlinish ehwali we sheherni qamal qilish weziyitining hemmidin éghir ikenliki melum bolghanidi.

“Xitay xewerliri” torining 10-awghust tarqatqan xewirige qarighanda, 9-awghustqiche Uyghur rayonida yéngidin köpeygen yuqumdar 21 ge yetken, buning ichide éniq diyagnuz qoyulghini 14 neper, késellik alamiti körülmigini 7 neper iken؛ yéngidin saqiyip doxturxanidighan chiqqanlar 47 neper, késellik alamiti körülmigen hemde késellik alamitini közitish bikar qilin'ghanlar 7 neper, éghir késeldin adettiki késelge özgergenler 2 neper bolup, bularning hemmisi ürümchi shehiridin iken.

9-Awghustqiche Uyghur rayonida (bingtu'ennimu öz ichige alidu) yuqumdar dep békitilgenler 592 neper (xeterlik bolghanliri 13 neper, éghir bolghanliri 22 neper) bolup, buning ichide ürümchidin 589 neper, qeshqerdin 1 neper, sanjidin 1 neper yuqumdar bar iken. Késellik alamiti yoq yuqumdar 123 neper bolup, buning ichide ürümchidin 122 neper, sanjidin 1 neper yuqumdar bar iken. Hazir 16 ming 947 neper adem doxturxanida közitish astida iken.

15-Iyuldin 9-awghustqiche saqiyip chiqqanlar 185 neper bolup, késellik alamiti yoqap, közitish bikar qilin'ghanlar 78 neper iken.