Уйғур елидики юқум қамалиниң аяғлашмаслиқи күчлүк диққәт қозғимақта

Мухбиримиз ирадә
2020-08-27
Елхәт
Пикир
Share
Принт

Уйғур елидики юқумни контрол қилиш үчүн елинған чекидин ашқан тәдбирләрниң һелиһәм давам қилиши күчлүк диққәт қозғимақта.

Хитай һөкүмити үрүмчидә корона вируси тарқалди, дегән сәвәб билән 7-айниң оттурилиридин тартип пүткүл уйғур елидә алаһазәл 22 милйон аһалини өйлиригә бәнд қиливәткәниди. Хәлқаралиқ ахбаратларниң әскәртишичә, үрүмчидин миңларчә километир узақлиқтики вә бирму вирус юқуми көрүлмигән хотән қатарлиқ җайлардиму қамалниң охшашла қаттиқ йүргүзүлүши диққәт қозғайдикән

Австралийәниң «ABC» қанилиниң хәвәр қилишичә, уйғур районида 18-июлдин башлап қамал елан қилинған. юқумлиниш башланғандин буян 900 дин артуқ вирус юқумланғучиси байқалған. Даириләр 16-авғусттин башлап вирус билән йеңидин юқумланғучи йоқ, дәп елан қилған. Бирақ һазирғичә қамал бикар қилинмиған болғачқа үрүмчидики бир қисим аһалиләр районлирида кишиләр балконлириға чиқип варқирап-җарқирап наразилиқини ипадә қилған, бәзиләр «ишикни ечиветиңлар» дәп варқириған.

«ABC» Қанили йәнә бир ғулҗада олтуридиған бир хитайниң вейбо ториға язған төвәндики сөзлирини хәвәр қилған «мениң апам үрүмчидин илиға қайтип кәлгәндин буян 40 күн бойичә карантинда туруватиду. Һалбуки бу йәрдә бирму юқум әһвали йоқ. Шинҗаң аһалиси болуш сүпитим билән мән һөкүмитимиздин толиму нарази болдум вә интайин үмидсизләндим. Улар йетәкчилик қилишта интайин начар, әмма бастурушқа бәк маһир».

Улар йәнә өз хәвиридә, уйғур елидә бир милйондин артуқ уйғур қатарлиқ йәрлик милләтләрниң лагерларға қамалғанлиқини вә бу җайниң адәттә һөкүмәтни тәнқид қилиш анчә мумкин болмайдиған орунлуқини әскәрткән.

Пикирләр (0)
Share
Толуқ бәт