Uyghur élidiki yuqum qamalining ayaghlashmasliqi küchlük diqqet qozghimaqta

Muxbirimiz irade
2020-08-27
Élxet
Pikir
Share
Print

Uyghur élidiki yuqumni kontrol qilish üchün élin'ghan chékidin ashqan tedbirlerning hélihem dawam qilishi küchlük diqqet qozghimaqta.

Xitay hökümiti ürümchide korona wirusi tarqaldi, dégen seweb bilen 7-ayning otturiliridin tartip pütkül Uyghur élide alahazel 22 milyon ahalini öylirige bend qiliwetkenidi. Xelq'araliq axbaratlarning eskertishiche, ürümchidin minglarche kilométir uzaqliqtiki we birmu wirus yuqumi körülmigen xoten qatarliq jaylardimu qamalning oxshashla qattiq yürgüzülüshi diqqet qozghaydiken

Awstraliyening "ABC" qanilining xewer qilishiche, Uyghur rayonida 18-iyuldin bashlap qamal élan qilin'ghan. Yuqumlinish bashlan'ghandin buyan 900 din artuq wirus yuqumlan'ghuchisi bayqalghan. Da'iriler 16-awghusttin bashlap wirus bilen yéngidin yuqumlan'ghuchi yoq, dep élan qilghan. Biraq hazirghiche qamal bikar qilinmighan bolghachqa ürümchidiki bir qisim ahaliler rayonlirida kishiler balkonlirigha chiqip warqirap-jarqirap naraziliqini ipade qilghan, beziler "Ishikni échiwétinglar" dep warqirighan.

"ABC" qanili yene bir ghuljada olturidighan bir xitayning wéybo torigha yazghan töwendiki sözlirini xewer qilghan "Méning apam ürümchidin iligha qaytip kelgendin buyan 40 kün boyiche karantinda turuwatidu. Halbuki bu yerde birmu yuqum ehwali yoq. Shinjang ahalisi bolush süpitim bilen men hökümitimizdin tolimu narazi boldum we intayin ümidsizlendim. Ular yétekchilik qilishta intayin nachar, emma basturushqa bek mahir".

Ular yene öz xewiride, Uyghur élide bir milyondin artuq Uyghur qatarliq yerlik milletlerning lagérlargha qamalghanliqini we bu jayning adette hökümetni tenqid qilish anche mumkin bolmaydighan orunluqini eskertken.

Toluq bet