Ürümchidiki qamal mezgilide ijra qilin'ghan tedbirler kishilerni wirustinmu bekrek qiynighan

Muxbirimiz eziz
2020-09-08
Share

Xitay hökümiti yéqinda ürümchi shehiridiki tajsiman wirusining toluq kontrol qilin'ghanliqini jakarlighandin kéyin kishilerde bu heqte türlük gumanlar peyda bolushqa bashlidi. Bolupmu qisqighine bir ay ichide wirus yuqumining nölge chüshkenliki heqqide her xil texminler otturigha chiqti. Xongkongdiki "Bashlan'ghuch" agéntliqi yéqinda élan qilghan mexsus maqalida bir qisim ürümchi ahalisining bu heqtiki qarashliri orun aldi.

Maqalida körsitilishiche, 35 kün dawam qilghan qamal jeryanida héchkim öyidin chiqalmighan. Öylerning sirti péchetlen'gen yaki mixliwétilgen bolghachqa buni buzup chiqqanlar bayqalghan haman saqchilar ularni namelum jaylargha élip ketken. Hökümetning orunlashturushiche boyiche karantin nuqtilirigha yighiwélin'ghan kishiler tarqitip bérilgen tamaqlarning buzulup qalghanliqi yaki purap qalghanliqini, bu heqte pikir qilsimu héchqandaq özgirish bolmighanliqini sözlep bergen.

Ürümchidiki bir qisim a'ililerde jiddiy késeller bayqalghan bolsimu qamal tedbiri tüpeylidin ularni doxturxanigha élip bérish imkaniyiti bolmighan. Buning bilen bir qisim késeller öydin chiqalmayla jan üzgen. Herqaysi mehellidiki kishiler kolléktip halda terkibide némilerning barliqinimu bilmigen namelum dorilarni ichishke mejburlan'ghan. Mal bahasining, bolupmu kündilik istémal buyumlirining bahasi birdinla hessilep éship ketkenliktin zor sandiki ahaliler hepte-heptilep nahayiti ghorigil tamaqlar bilen kün ötküzüshke mejbur bolghan. Bir qisim sheher ahalisi téléfonda muxbirlarning ziyaritini qobul qilghanda "Bizni wirus emes, belki hökümetning öylerge qamap qoyush tedbirliri bekla qiynap kétiwatidu" dégen.

Hökümet tarmaqliri gerche qamal tedbirlirining bikar qilin'ghanliqini élan qilghan bolsimu bir qisim jaylarda yenila mehellining sirtigha chiqishqa bolmaydiken. Sirtqa chiqishqa bolidighan jaylardimu kishilerde wirusning üzül-késil tügigenlikige ishenchi bolmighanliqi üchün bir qisim kishiler yenila özlirini qorqunchtin xalas qilalmighan. Aptor axirida héchqandaq wirus yuqumi bayqalmighan qaramay, küytun, ghulja qatarliq jaylardimu oxshash tedbirlerning ijra qilinishi heqqide toxtilip "Bu jaylarni hergizmu panahliq makani dep qarashqa bolmaydu" deydu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.