Uyghur diyaridiki wirus yuqumining töwenligenliki zor guman'gha seweb bolmaqta

Muxbirimiz eziz
2022.09.21
Share on WhatsApp
Share on WhatsApp

Xitay hökümiti bashqurushidiki “Tengritagh tori” ning 20-séntebirdiki xewiride éytilishiche, shu küni yérim kéchige qeder héchqandaq yéngi bimar bayqalmighan. Yéngidin köpeygenler peqet 11 neper alametsiz bimarlar bolup asasliqi ürümchi, ghulja we korla qatarliq jaylardin bayqalghan.

Xewerde hazirgha qeder pütkül Uyghur diyarida éniq di'agnoz qoyulghan bimardin ikki neper barliqi éytilghan bolup, bu arqiliq yéqindin buyan tekitliniwatqan wirus yuqumining kontrol qilin'ghanliqi gewdilendürülgen. Xitay bashqurushidiki “Shinjang géziti” ning 21-séntebirdiki xewiride hazir ghulja shehiride “Üch toxtash” (xizmet, tijaret we mulazimet toxtash) arqiliq bashquruluwatqan rayonlar sanining tézdin aziyiwatqanliqini alahide gewdilendürüsh arqiliq yuqumning kontrolluqqa élin'ghanliqi wasitilik halda algha sürülgen. Shu qatarda köpligen mikro rayonlarning ‍échiwétilgenliki, normal hayatning eslige kéliwatqanliqi, shundaqla yuqum ehwalining hazir turpan, aqsu qatarliq bashqa jaylardimu kontrolluqqa élin'ghanliqi eskertilgen.

Halbuki ijtima'iy taratqularda keng tarqiliwatqan qisqa filimlar Uyghur diyaridiki yuqum kontroli bahaniside qattiq qolluq bilen ijra qilin'ghan qamal tedbirlirining éghir acharchiliqqa sewebkar bolghanliqini, shuningdek bu jeryanda nurghun kishining achliqtin ölüp ketkenlikini körsitiwatqan bolup, qamalning hélihem dawam qiliwatqanliqini biwasite testiqlaydu. Hökümet da'irilirining xitay kompartiyesining 20-qurultiyi échilishqiche bolghan mezgilde “Omumiy weziyetning muqimliqigha képillik qilish” heqqidiki chaqiriqliri bolsa nöwettiki qamal tedbirlirining az dégendimu öktebir éyining ‍otturilirighiche dawam qilishidin bésharet, dep qariliwatqanliqi melum.

Yéqinqi mezgillerde xitay hökümitining “Yuqumni nölge chüshürüsh” sho'‍ari astida rehimsizlik bilen ijra bolghan qamal qilish charilirining qandaq éghir paji'elerni keltürüp chiqarghanliqi chet'ellerdiki dangliq axbarat wasitiliride köplep xewer qilin'ghan hemde xitay hökümitining bu xildiki “Yuqum tedbirliri” ni bir qisim Uyghur pa'aliyetchiler “Acharchiliq qirghinchiliqi” dep atighanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.