Pütkül qeshqer rayonida tajsiman wirusini tekshürtüsh bashlandi

Muxbirimiz eziz
2020-10-26
Élxet
Pikir
Share
Print

Qeshqer ahalisi ichide tajsiman wirusi bilen yuqumlan'ghan alametsiz bimarlarning sani 138 ge yetkenliki melum bolush birge, xitay hökümiti 26-öktebirdin bashlap besh milyon'gha yéqin ahalini toluq tekshürtüsh xizmitini bashlidi.

CNN Agéntliqining 26-öktebirdiki xewiride éytilishiche, qeshqerde bayqalghan alametsiz bimarlarning sani xitayda ötken yette aydin buyan melum bolghan kündilik sani eng yuqiri bolghan yuqum rékordi hésablinidiken. Nöwette üch milyon'gha yéqin kishi özini tekshürtüp bolghan bolup, xitay da'iriliri 600 nechche neper tébbiy xadimni yardem üchün herqaysi jaylardin qeshqerge yötkigen. Nöwettiki tekshürüsh sür'iti boyiche bolghanda 27-öktebir küni özini tekshürtkenlerning sani besh milyon'gha yéqinlap qalidiken.

Xewerde éytilishiche, qeshqerdiki tunji bimar melum bir kiyim-kéchek zawutida ishlewatqan 17 yashliq bir qiz bolup, shu jaydiki bir yézidin kelgen iken. Gerche u qiz ishlewatqan zawuttiki 800 dek ishchini tekshürüsh netijisi menfi bolup chiqqan bolsimu, emma u qizning ata-anisi, shuningdek ata-anisi ishlewatqan zawuttiki 137 ishchining wirus bilen yuqumlan'ghanliqi melum bolghan. Nöwette mushu yuqum tüpeylidin téxi yéqinda bikar qilin'ghan sheherni qamal qilish tedbirliri yéngiwashtin yolgha qoyulghan. Qeshqerning sirt bilen bolghan hawa we quruqluq qatnishi toxtighan.

Halbuki, xitay hökümitining wirus yuqumini tekshürtüsh usulliri xataliq derijisining yuqiriliqi bilen xelq'araning küchlük tenqidige uchrap kelgen idi. Yene bir qisim mutexessisler bolsa qeshqerni pütünley qamal qilishtek bu tedbirni "Bekla chékidin éship ketkenlik" démekte iken.

Qeshqerdiki yuqumning heqiqiy ehwali xewerlerde éytilghandin ‍éghir ikenliki qiyas qiliniwatqanliqi bolup, Uyghur aptonom rayonluq partkomning sékrétari xitay chén chu'en'go 25-öktebir küni qeshqerge kélip, wirus xizmitining nöwettiki ehwalini tekshürgen.

Toluq bet