Qeshqerdiki tajsiman wirusi tézdin köpiyishke bashlidi

Muxbirimiz eziz
2020-10-28
Share

Qeshqerde dawam qiliwatqan tajsiman wirusining aldinqi künde yéngidin 22 kishige yuqqanliqi, buning bilen nöwette yuqumdarlarning sani 183 ke yetkenliki nöwettiki yuqum ehwalining téz kéngiyiwatqanliqini körsetmekte iken. Xitay hökümitining kaniyi bolghan shinxu'a agéntliqining 28-öktebirdiki xewiride éytilishiche, bu yuqumdarlarning hemmisi qeshqer wilayitining konasheher nahiyisi teweside iken.

Qeshqerdiki yuqum ehwali we tekshürüsh xizmiti heqqide köpligen gumanliq so'allar otturigha qoyuluwatqanda konasheher nahiyesidiki qamal tedbirliri etraptiki qoshna yézilarghiche omumlashqan. Jümlidin wirusning bashlan'ghan nuqtisi dep qariliwatqan, shundaqla bezi mutexessisler mejburiy emgek dawam qiliwatqan lagér zawutlirining biri bolushi mumkin, dep qarawatqan zemin yézisi 3-kentidiki toqumichiliq zawutining taqiwétilgenliki xitay axbaratliridin keng yer alghan.

Xitay hökümitining türlük xewerliride ushtumtut bayqalghan wirus yuqumi seweblik kütülmigen qamal tedbiri élin'ghanliqi, buning bilen herqaysi a'ililiklerning öylirige qamilip qalghanliqi, shundaq bolsimu 24 sa'etlik qiziq liniye téléfoni arqiliq bu kishilerni kündilik lazimetlikler bilen teminleshning muqim dawam qiliwatqanliqi éytilghan. Halbuki, muhajirettiki közetküchiler ilgiri xitay ölkiliride we yéqinda ürümchide ijra qilin'ghan qamal tedbirlirini misal qilish arqiliq nöwettiki qamal jeryanida shu jaydiki yerlik ahalining qandaq müshkülatlargha duch kéliwatqanliqini tesewwur qilish qiyin ikenlikini bildürdi.

Melum bolushiche, shu künning özide pütkül xitay boyiche 42 neper yéngi yuqumdar bayqalghan bolup, buning 22 nepiri konasheher nahiyeside iken. Emma xitay hökümitining bu xildiki ehwalda héchqachan heqiqiy sanni melum qilmaydighanliqi tüpeylidin köp qisim analizchilar bu sanning emeliyette buningdin köp ikenlikini algha sürmekte iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.