Уйғур диярида вирус юқуминиң тохтиғанлиқи гуман қозғимақта

Мухбиримиз әзиз
2020-08-18
Елхәт
Пикир
Share
Принт

Йеқинқи мәзгилләрдә вирус мәнбәси намәлум һалда уйғур диярида әвҗ елип кәткән таҗсиман вирусиниң толуқ контрол қилинғанлиқи бүгүндин башлап хитай ахбаратлирида кәң йәр елишқа башлиди.

Хитай һөкүмити башқуришидики шинхуа агентлиқиниң 18-авғуст күнидики хәвиридә ейтилишичә, вирустин юқумланған кишиләрниң сани нөлгә чүшкән болуп, шу күни пәқәт аламәтсиз вирус юқумдаридин бирла киши байқалған.

Һалбуки «тәңритағ тори» ниң 18-авғусттики хәвиридә ейтилишичә, шу күни үрүмчи шәһридики бәш йүздин артуқ хоҗулиқ мулазимәт ширкитиниң оттуз миңдин артуқ хизмәтчиси һәрқайси олтурақ районларда «өткәлни чиң тутуш, иш орнида чиң туруш» чақириқи бойичә қаттиқ қаравуллуқ вә назарәтни иҗра қилишқа аҗритилған. «Соху тори» да болса «бирму адәмгә сәл қаримаслиқ, бирму аилини чүшүрүп қоймаслиқ» үчүн 50 миңға йеқин асасий қатлам кадириниң үрүмчидики вирусқа қарши биринчи сәпкә атланғанлиқи ейтилған.

Муһаҗирәттики анализчилар мушу әһвалға асасән, хитай һөкүмитиниң әйни вақитта вухән шәһридиму «қаттиқ қамал» арқилиқ барлиқ вирус юқумдарлирини бир җайға топлиғанлиқини, үрүмчи шәһридики әһвалниңму ашуниңға охшап кетидиғанлиқини, шундақла хитай һөкүмитиниң бу қетимқи вирус һәққидә бәргән мәлуматлириға ишинишкә болмайдиғанлиқини алға сүриду. Америкадики мустәқил көзәткүчи илшат һәсән бу тоғрисида тохтилип: «30-40 миңлап кадирни вирусқа қарши биринчи сәпкә әвәткәнниң өзи үрүмчидики вирус әһвалиниң техи тамамән контрол қилинип болунмиғанлиқини ашкара көрситиду. Рошәнки, хитай һөкүмити йәнә бир қетим дуняни алдашниң қәстидә болуватиду,» деди.

Пикирләр (0)
Share
Толуқ бәт