Uyghur diyarida wirus yuqumining toxtighanliqi guman qozghimaqta

Muxbirimiz eziz
2020-08-18
Élxet
Pikir
Share
Print

Yéqinqi mezgillerde wirus menbesi namelum halda Uyghur diyarida ewj élip ketken tajsiman wirusining toluq kontrol qilin'ghanliqi bügündin bashlap xitay axbaratlirida keng yer élishqa bashlidi.

Xitay hökümiti bashqurishidiki shinxu'a agéntliqining 18-awghust künidiki xewiride éytilishiche, wirustin yuqumlan'ghan kishilerning sani nölge chüshken bolup, shu küni peqet alametsiz wirus yuqumdaridin birla kishi bayqalghan.

Halbuki "Tengritagh tori" ning 18-awghusttiki xewiride éytilishiche, shu küni ürümchi shehridiki besh yüzdin artuq xojuliq mulazimet shirkitining ottuz mingdin artuq xizmetchisi herqaysi olturaq rayonlarda "Ötkelni ching tutush, ish ornida ching turush" chaqiriqi boyiche qattiq qarawulluq we nazaretni ijra qilishqa ajritilghan. "Soxu tori" da bolsa "Birmu ademge sel qarimasliq, birmu a'ilini chüshürüp qoymasliq" üchün 50 minggha yéqin asasiy qatlam kadirining ürümchidiki wirusqa qarshi birinchi sepke atlan'ghanliqi éytilghan.

Muhajirettiki analizchilar mushu ehwalgha asasen, xitay hökümitining eyni waqitta wuxen shehridimu "Qattiq qamal" arqiliq barliq wirus yuqumdarlirini bir jaygha toplighanliqini, ürümchi shehridiki ehwalningmu ashuninggha oxshap kétidighanliqini, shundaqla xitay hökümitining bu qétimqi wirus heqqide bergen melumatlirigha ishinishke bolmaydighanliqini algha süridu. Amérikadiki musteqil közetküchi ilshat hesen bu toghrisida toxtilip: "30-40 Minglap kadirni wirusqa qarshi birinchi sepke ewetkenning özi ürümchidiki wirus ehwalining téxi tamamen kontrol qilinip bolunmighanliqini ashkara körsitidu. Roshenki, xitay hökümiti yene bir qétim dunyani aldashning qestide boluwatidu," dédi.

Toluq bet