Хитай саяһәтчиләр қәшқәр, хотән қатарлиқ җайларда һәқсиз бихәтәрлик суғуртиси билән тәминлинидикән

Мухбиримиз әркин
2019-05-27
Елхәт
Пикир
Share
Принт

Уйғур райониниң җәнубидики 3 вилайәт бир областниң хитай өлкилиридики хитай саяһәтчилиригә әгәр бу районларға саяһәткә кәлсә, һәқсиз шәхсий бихәтәрлик суғуртиси билән тәминләйдиғанлиқи һәққидә вәдә бәргәнлики ашкариланди.

Шаңхәйдики «азадлиқ гезити» ниң йеқинда ашкарилишичә, юқириқи вилайәт областлар шаңхәйдики саяһәт ширкәтлири билән бу тоғрисида келишим имзалиған. Қәшқәр вилайәтлик мәмури мәһкимиси хитайниң шаңхәй шәһиридики шаңхәй тинч окян мал-мүлүк бихәтәрлик суғурта ширкити билән келишим имзалиған болуп, қәшқәр вилайәтлик мәмури мәһкимә хитай саяһәтчилирини һәқсиз шәхсий бихәтәрлик суғуртиси билән тәминләшни үстигә алған. Қәшқәр вилайитиниң бу саяһәттин қанчилик кирим қилидиғанлиқи, шуниңдәк һәқсиз бихәтәрлик суғуртисиниң қәшқәр вилайитигә қанчилик йүк болидиғанлиқи мәлум әмәс.

Хитай һөкүмити бу йил деңиз бойидики өлкә-шәһәрләрниң пуқралирини уйғур райониниң ақсу, қәшқәр, хотән, қизилсу қатарлиқ җайлирини саяһәт қилишқа сәпәрвәрлик һәрикити қозғиған. Хитайниң бу һәрикити лагерлар мәсилиси хәлқара җәмийәтниң қаттиқ нәпритигә учрап, нурғун хәлқара ширкәтләр бу район билән болған сода алақисини үзүватқан бир мәзгилгә тоғра кәлгән иди.

«Азадлиқ гезити» ниң хәвиридә қәйт қилинишичә, хитай һөкүмити пуқралириниң уйғур районида саяһәттә болушқа риғбәтләндүрүш үчүн хитай өлкилиридә мәхсус тәшвиқат вә мулазимәт җәмийәтлирини тәшкиллигән. Хәвәрдә баян қилинишичә, шаңхәй, җеҗяң, җяңсу, әнхуй қатарлиқ өлкә шәһәрләрдә қурулған «җәнубий шинҗаңға саяһәт қилип, шинҗаңға нишанлиқ ярдәм бериш иттипақи» мана шундақ җәмийәтләрниң бири икән. Мәзкур иттипақ 20‏-май күни шаңхәй шәһиридә тәшвиқат паалийити өткүзүп, хитай пуқралириға ақсу, қәшқәр, қизилсу вә хотәнни тонуштурған.

Көзәткүчиләрниң илгири сүрүшичә, хитай һөкүмити 2 милйондәк уйғурни йиғивелиш лагерлириға қамап, уйғур җәмийитигә қарита омумйүзлүк тәқибләш йүргүзгән бир мәзгилдә хитай пуқралириға қарита уйғур районини саяһәт қилиш һәрикити қозғиши хәлқараға «шинҗаңниң вәзийити нормал» дегән сигнални беришни мәқсәт қилидикән.

Пикирләр (0)
Share
Толуқ бәт