Xitay sayahetchiler qeshqer, xoten qatarliq jaylarda heqsiz bixeterlik sughurtisi bilen teminlinidiken

Muxbirimiz erkin
2019-05-27
Élxet
Pikir
Share
Print

Uyghur rayonining jenubidiki 3 wilayet bir oblastning xitay ölkiliridiki xitay sayahetchilirige eger bu rayonlargha sayahetke kelse, heqsiz shexsiy bixeterlik sughurtisi bilen teminleydighanliqi heqqide wede bergenliki ashkarilandi.

Shangxeydiki "Azadliq géziti" ning yéqinda ashkarilishiche, yuqiriqi wilayet oblastlar shangxeydiki sayahet shirketliri bilen bu toghrisida kélishim imzalighan. Qeshqer wilayetlik memuri mehkimisi xitayning shangxey shehiridiki shangxey tinch okyan mal-mülük bixeterlik sughurta shirkiti bilen kélishim imzalighan bolup, qeshqer wilayetlik memuri mehkime xitay sayahetchilirini heqsiz shexsiy bixeterlik sughurtisi bilen teminleshni üstige alghan. Qeshqer wilayitining bu sayahettin qanchilik kirim qilidighanliqi, shuningdek heqsiz bixeterlik sughurtisining qeshqer wilayitige qanchilik yük bolidighanliqi melum emes.

Xitay hökümiti bu yil déngiz boyidiki ölke-sheherlerning puqralirini Uyghur rayonining aqsu, qeshqer, xoten, qizilsu qatarliq jaylirini sayahet qilishqa seperwerlik herikiti qozghighan. Xitayning bu herikiti lagérlar mesilisi xelq'ara jem'iyetning qattiq nepritige uchrap, nurghun xelq'ara shirketler bu rayon bilen bolghan soda alaqisini üzüwatqan bir mezgilge toghra kelgen idi.

"Azadliq géziti" ning xewiride qeyt qilinishiche, xitay hökümiti puqralirining Uyghur rayonida sayahette bolushqa righbetlendürüsh üchün xitay ölkiliride mexsus teshwiqat we mulazimet jem'iyetlirini teshkilligen. Xewerde bayan qilinishiche, shangxey, jéjyang, jyangsu, enxuy qatarliq ölke sheherlerde qurulghan "Jenubiy shinjanggha sayahet qilip, shinjanggha nishanliq yardem bérish ittipaqi" mana shundaq jem'iyetlerning biri iken. Mezkur ittipaq 20‏-may küni shangxey shehiride teshwiqat pa'aliyiti ötküzüp, xitay puqralirigha aqsu, qeshqer, qizilsu we xotenni tonushturghan.

Közetküchilerning ilgiri sürüshiche, xitay hökümiti 2 milyondek Uyghurni yighiwélish lagérlirigha qamap, Uyghur jem'iyitige qarita omumyüzlük teqiblesh yürgüzgen bir mezgilde xitay puqralirigha qarita Uyghur rayonini sayahet qilish herikiti qozghishi xelq'aragha "Shinjangning weziyiti normal" dégen signalni bérishni meqset qilidiken.

Toluq bet