Uyghur élige xitay ölkiliridin 20 ming neper oqutquchi qobul qilinidiken

Muxbirimiz irade
2019-02-28
Share

Xitay hökümiti 2019-yili ichide Uyghur élige xitay ölkiliridin 20 ming neper xitayni oqutquchi qilip yötkeshni pilanlimaqtiken.

"Xitay xewerler tori" ning 26-féwral künidiki xewirige qarighanda, yuqiriqi bu pilan xitay ma'arip ministirliqining "On ming oqutquchi arqiliq tibet we shinjanggha yardem bérish" namliq siyasitige asasen élip bérilidiken. 

Xewerge qarighanda, mezkur pilan'gha asasen ötken yili ichide xitay ölkiliridin aliy mekteplerni püttürgen 7000 kishi Uyghur élige oqutquchiliqqa qobul qilin'ghan. Da'iriler bu yil bu sanni yenimu ashurup, 20 ming neperge yetküzüshni pilanlimaqtiken. 

Xébéy ölkisi bolsa 26-féwral küni 203 neper yesli oqutquchisi we aliy mektep oqughuchilirini murasim bilen Uyghur élige uzitip qoyghan. Xewerde éytilishiche, ular bayin'gholin oblasti we bingtu'enning 2-diwiziyesige qarashliq sheherlerdiki mekteplerge orunlashturulidiken. Xébéy ölkisidin yéqinqi 2 yil ichide Uyghur élige ewetilgen oqutquchi sani 860 neperdin ashidiken. 

Uyghur aptonom rayonluq da'iriler yéqindin buyan türlük siyasetler boyiche xitay ölkiliridin adem qobul qilishni yenimu tézletmekte. Téxi mushu ayning béshida ghulja nahiyilik hökümet nahiye tewesidiki bashlan'ghuch we ottura mekteplerge xitay ölkiliridin 600 neper xitay tili oqutquchisi qobul qilish élani chiqarghan idi. Oxshash mezgilde yene cherchen nahiyisimu xitay miqyasi boyiche jem'iy 86 neper oqutquchi we 200 neper memuriy xadim qobul qilidighanliqi heqqide uqturush chiqarghan idi.

Chet'ellerdiki Uyghur közetküchiler xitay hökümitining Uyghur élige köplep xitay köchmenlirini yötkep, lagérlargha qamalghan Uyghurlarning ornini toldurmaqchi boluwatqanliqini perez qilishmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet