Байинғолин области бовақ балиларни пәрвиш қилидиған йәсли оқутқучилирини тәрбийәләш қурулушини күчәйтидикән

Мухбиримиз ирадә
2020-06-25
Елхәт
Пикир
Share
Принт

Йеқинда байинғолин областлиқ педагогика мәктипи уйғур елиниң ичи вә сиртидин 280 нәпәр хизмәтчи хадим қобул қилидиғанлиқи һәққидә бир уқтуруш тарқатқан. «Байинғолин гезити» ниң бу һәқтики хәвиригә қариғанда, бу йиллиқ қобул қилиш түригә йеңидин «бала беқиш программиси» қошулған болуп, бу асаслиқ бовақларни беқиш мулазимитини көздә тутидикән.

Уйғур елидә 3 милйонға йеқин киши лагерларға қамилип, он миңлиған уйғур пәрзәнтлири тирик йетимға айланған бир мәзгилдә елан қилинған бу хәвәр чәтәлләрдики көзәткүчиләрниң диққитини қозғиди.

Хәвәрдин қариғанда, байинғолин областлиқ педагогика мәктипи бовақларни беқиш мулазимәт әтрити қурулушини күчәйтишни мәқсәт қиливатқан болуп, униңда мундақ дейилгән: «йеңи қобул қилинған хадимлар мәхсус кәспий нәзәрийәви билимләрни өгиниш вә мәшғулат маһарәт мәшиқи арқилиқ бовақлар вә кичик балиларниң физиологийәси, психика тәрәққияти вә сақлиқни сақлаш билимлириниң алаһидиликини игилийәләйду, бовақларни беқиштики ортақ күтүнүш усуллири вә тасадипий вәқәләрни бир тәрәп қилиш иқтидарини өгиниду.»

Юқириқи мәктәп даирилири мәктәп пүттүргән оқуғучиларниң кәлгүсидә шәһәр вә йезилардики йәсли, башланғуч мәктәпкә киришниң алдидики дәсләпки тәрбийә орунлири, бовақларни беқиш мулазимити вә башқа мунасивәтлик орунларда ишқа орунлишидиғанлиқини билдүргән.

Нөвәттә лагерға қамалған милйонлиған уйғур ата-аниларниң пәрвишсиз қалған балилириниң хитай һөкүмити тәрипидин «пәриштиләр мәктипи» дегәндәк чирайлиқ намлар билән безәлгән, әмәлийәттә балилар лагерлири болған йетимханиларға йиғивелинип, хитай тили вә мәдәнийити бойичә тәрбийәлиниватқанлиқи мәлум. Мәзкур һадисә уйғурлар вәзийитини көзитип келиватқан кишилик һоқуқ органлири вә мутәхәссисләрниң күчлүк диққитини қозғап кәлмәктә. Хитай даирилириниң уйғур балилирини «ятақлиқ мәктәпләр» гә йиғивелиш һәрикитини омумйүзлүк һалда кеңәйтиватқан болуп, мутәхәссисләр буни уйғур әвладлирини ассимилятсийә қилишни мәқсәт қилған «мәдәнийәт қирғинчилиқи» һәрикити дәп атимақта.

Пикирләр (0)
Share
Толуқ бәт