Bayin'gholin oblasti bowaq balilarni perwish qilidighan yesli oqutquchilirini terbiyelesh qurulushini kücheytidiken

Muxbirimiz irade
2020-06-25
Élxet
Pikir
Share
Print

Yéqinda bayin'gholin oblastliq pédagogika mektipi Uyghur élining ichi we sirtidin 280 neper xizmetchi xadim qobul qilidighanliqi heqqide bir uqturush tarqatqan. "Bayin'gholin géziti" ning bu heqtiki xewirige qarighanda, bu yilliq qobul qilish türige yéngidin "Bala béqish programmisi" qoshulghan bolup, bu asasliq bowaqlarni béqish mulazimitini közde tutidiken.

Uyghur élide 3 milyon'gha yéqin kishi lagérlargha qamilip, on minglighan Uyghur perzentliri tirik yétimgha aylan'ghan bir mezgilde élan qilin'ghan bu xewer chet'ellerdiki közetküchilerning diqqitini qozghidi.

Xewerdin qarighanda, bayin'gholin oblastliq pédagogika mektipi bowaqlarni béqish mulazimet etriti qurulushini kücheytishni meqset qiliwatqan bolup, uningda mundaq déyilgen: "Yéngi qobul qilin'ghan xadimlar mexsus kespiy nezeriyewi bilimlerni öginish we meshghulat maharet meshiqi arqiliq bowaqlar we kichik balilarning fizi'ologiyesi, psixika tereqqiyati we saqliqni saqlash bilimlirining alahidilikini igiliyeleydu, bowaqlarni béqishtiki ortaq kütünüsh usulliri we tasadipiy weqelerni bir terep qilish iqtidarini öginidu."

Yuqiriqi mektep da'iriliri mektep püttürgen oqughuchilarning kelgüside sheher we yézilardiki yesli, bashlan'ghuch mektepke kirishning aldidiki deslepki terbiye orunliri, bowaqlarni béqish mulazimiti we bashqa munasiwetlik orunlarda ishqa orunlishidighanliqini bildürgen.

Nöwette lagérgha qamalghan milyonlighan Uyghur ata-anilarning perwishsiz qalghan balilirining xitay hökümiti teripidin "Perishtiler mektipi" dégendek chirayliq namlar bilen bézelgen, emeliyette balilar lagérliri bolghan yétimxanilargha yighiwélinip, xitay tili we medeniyiti boyiche terbiyeliniwatqanliqi melum. Mezkur hadise Uyghurlar weziyitini közitip kéliwatqan kishilik hoquq organliri we mutexessislerning küchlük diqqitini qozghap kelmekte. Xitay da'irilirining Uyghur balilirini "Yataqliq mektepler" ge yighiwélish herikitini omumyüzlük halda kéngeytiwatqan bolup, mutexessisler buni Uyghur ewladlirini assimilyatsiye qilishni meqset qilghan "Medeniyet qirghinchiliqi" herikiti dep atimaqta.

Toluq bet