Уйғур елида өсмүр балиларниң зәһәрлик чекимликкә адәтлиниш мәсилиси еғирлашмақта

Шинхуа агентлиқи инглизчә тарқатқан бир хәвәрдин, уйғур елида яш өсмүр балиларниң зәһәр чекимлик чекиш мәсилисиниң еғирлиқи мәлум болмақта.

Бу һәқтики хәвәрдә уйғур районлуқ зәһәрлик чекимликкә қарши туруш комитетиниң муавин башлиқи җу чаңҗе зиярәт қилинған болуп, у сөзидә уйғур елида йеқинқи йиллардин буян яш өсмүрләрниң зәһәрлик чекимлик чекиш, сетиш һадисилириниң кәң омумлашқанлиқини ейтип “биз буниң алдини елиш вә уни контрол қилишта зор қийинчилиқларға дуч келиватимиз” дегән. Әмма хәвәрдә буниңға аит санлиқ мәлумат берилмигән.

Мәзкур хәвәр чәтәлләрдики уйғур көзәткүчиләрниң диққитини қозғиди. Улар, хитай һөкүмитиниң уйғур елида “полаттин там ясап, асманғичә тор селиш” дегән шоари бойичә барлиқ техника вә адәм күчини аталмиш “муқимлиқ” ни қоғдашқа сәрп қиливатқанлиқини әскәртти.

Бирақ, юқиридики әмәлдар яшлар арисида зәһәрниң ямраш мәсилисиниң сәвәбини көрсәткәндә, буни уйғур елиниң “алтун үч бурҗәк” райониға йеқин болуши вә хәлқара җәмийәтниң тәсиригә учриши билән мунасивәтлик, дегән.