Sofiye richardson: “Shinjangdiki chet'el shirketliri kishilik hoquqni étibargha élishi kérek, bolmisa jinayetke shérik bolidu”

Muxbirimiz erkin
2019.08.16

Kishilik hoquqni közitish teshkilati xitay bölümining diréktori sofiye richardson “Washin'gton pochtisi” gézitide maqale élan qilip, Uyghur rayonidiki chet'el shirketlirining bu rayonda yüz bériwatqan kishilik hoquq depsendichilikige shérik bolup qalmasliqni agahlandurdi.

Richardson xanim bu agahlandurushni özining 16 ‏-awghust küni élan qilin'ghan “Shinjangdiki chet'el shirketliri kishilik hoquqni étibargha élishi kérek, bolmisa jinayetke shérik bolidu” serlewhilik maqaliside otturigha qoyghan. Uning maqaliside tekitlishiche, xitay hökümitining bu rayondiki qorqunchluq kishilik hoquq xatirisini nezerde tutqanda xelq'ara shirketlerning bu rayondiki soda meshghulatlirigha téximu köp diqqet qilishning waqti kelgen. U halliburton, döletlik waskétbol jem'iyiti nba qatarliq amérika shirketlirining bu rayonda pa'aliyet élip bériwatqanliqini eskertip, chet'el shirketlirining xitay hökümitining basturush heriketlirige yardemleshkenlik tarixiy barliqi, bezi shirketler jem'iyetning bésimida siyasitini özgertken bolsimu, lékin bezi shirketlerning burunqi soda munasiwetlirini tashlighanliqini bildürgen. Uning qeyt qilishiche, nöwette xitayning kéda féyshün, xitay éléktron téxnologiye guruhidek bezi shirketler xitay hökümitige hemkarliship, rayondiki xitay amanliq organlirining téléfonda awaz tonushi, yürüsh-turushi gumanliq kishilerni teqib qilishigha yardemleshken.

Richardson xanim maqaliside yene térmo-féshir, bajir shirkitidek bezi amérika karxanilirining mezkur rayondiki hökümet we shirketler bilen hemkarlishishni toxtatqanliqi, bashqa shirketlerning ularni ülge qilishi kéreklikini bildürgen. Uning qeyt qilishiche, Uyghur rayonidiki chet'el shirketliri derhal bu rayonning kishilik hoquq weziyitini bahalap chiqishi, mehsulatlirining mezkur rayonda bashqa meqsetke ishlitiliwatqan yaki ishlitilmeywatqanliqini, bu rayondiki xitay karxanilirigha zakaz qilghan mehsulatlirining ishlepchiqirilishida emgek heqlirige emel qilin'ghan-qilinmighanliqini tekshürüshi, shirketler yuqiriqi ehwallarni 3‏-bir musteqil terepning tekshürüshige hawale qilishi, özlirining Uyghur rayonidiki soda pa'aliyetliride ochuq-ashkara bolushi, özi bilen hemkarlishiwatqan yerlik karxana yaki hökümet organlirining ismini ashkara élan qilishi kérek iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.