Uyghur diyarining toklirini xitay ölkilirige toshush köpeytilmekte

Muxbirimiz ümidwar
2018-03-25
Share

Xitay da'iriliri Uyghur diyaridin ichkiri xitay ölkilirige tok yetküzüsh miqdarini téximu ashurushni pilan qilmaqta. "Shinjangning tokini ottura tüzlenglikke yetküzüsh" dep atalghan mezkur tok yetküzüsh qurulushi 2012-yili ishqa kiriship, Uyghur diyarining éléktr énérgiyesini xitayning xu'angxé we changjyang deryasi wadilirigha yetküzüsh dawamlishiwatqan bolup, tok yetküzüsh miqdari yildin yilgha köpeytilgen.

"Shinjang géziti" ning xewer qilishiche, da'iriler bu yil mezkur liniyide tok yetküzüsh miqdarini téximu köpeytishke heriket qilip, hazirghiche 16 ölke we sheherdiki 250 milyondin artuq ahalini 150 milyard kilowat sa'et tok bilen teminligen. 

Xitay da'iriliri ilgiri, 2016-yilidin bashlap jenubiy jungghardin changjyang deryasi wadisidiki bir qisim sheherlerni tutashturidighan yuqiri miqdardiki alahide yuqiri bésimliq turaqliq tok yetküzüsh liniyisi qurulushini bashlighan bolup, bu yil axirghiche mezkur qurulushni tamamlaydiken. Buning bilen her yili mezkur tok yetküzüsh liniyisi boyiche 16 ölke sheherni her yili 66 milyard kilowat sa'et tok bilen teminlesh sewiyisige yétidiken. 
Xitay da'iriliri mezkur tok yetküzüsh qurulushini "Pakiz énérgiye bilen teminlesh" dep atawatqan bolup, Uyghur diyari xitayni mundaq pakiz énérgiye bilen teminleydighan asasliq menbege aylan'ghan. Nöwette, xitay da'iriliri mezkur qurulushni "Bir belwagh bir yol" pilanining bir qismi dep qarimaqta.

Buningdin bashqa yene Uyghur diyarining tebi'iy gazlirini ichkiri xitaygha toshush miqdarinimu köpeytish üchün heriket qiliniwatqan bolup, tarim wadisidin toshulidighan tebi'iy gaz xitayning sherqidiki 400 milyon ahalini we üch mingdin artuq zawut-karxanining énérgiye éhtiyajini hel qilmaqta iken. Wehalenki, Uyghur közetküchilirining qarishiche, tarim wadisi etrapidiki nahiyiler eng kembeghel nahiyiler, Uyghur ahaliliri bolsa eng namrat puqralar hésablinidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet