Пакистанлиқ мутәхәссис: “хитайниң шинҗаңға селиватқан мәбләғлири бизгә зиянлиқ”

Мухбиримиз шөһрәт һошур
2017.12.20

Пакистанниң “милләт” (The Nation) гезитидә мақалә елан қилған мутәхәссис камал манно, хитай-пакистан иқтисадий каридориниң, болупму хитайниң уйғур аптоном районидики тоқумичилиққа селиватқан мәблиғиниң пакистан ширкәтлири үчүн хәвп елип келидиғанлиқини илгири сүрди.

Хитайниң уйғур аптоном районини 2023‏-йилиға қәдәр катта пахта ишләпчиқириш, тоқумичилиқ вә кийим-кечәк фабрика базисиға айландуруш пиланини тилға алған аптор буниң нәтиҗисидә бүгүнгә қәдәр адаләтсиз риқабәт билән явропа вә америка ширкәтлирини қақшитип келиватқан хитай ширкәтлириниң пакистанниң босуғисиға келидиғанлиқи вә пакистан ширкәтлириниң дөләт һәр вақит арқисидин йөләйдиған, содида қанун вә тәртип тонумайдиған хитай ширкәтлиригә йеңилиш еһтималлиқини оттуриға қойған.

Апторниң баян қилишичә, дуня сода тәшкилати хитайниң сода саһәсидики хаталиқлириниң һәммини назарәт қилиш вә түзитишкә үлгүрмигән. явропа бирликиму бу йил ичидә мәхсус тәкшүрүш елип барған 33 делониң 22 си хитай карханилириға четишлиқ болуп чиққан. Камал манно мақалисидә, хитайниң уйғур районида пахта вә тоқумичилиқ селиватқан мәбләғлириниң көплүки, пакистан тоқумичилиқ саһәсидә йеқинқи йилларда 30 пирсәнттәк ширкәтниң тақалғанлиқидәк реаллиқини әслитип өткән.

Муһаҗирәттики уйғур паалийәтчиләр, хитайниң уйғур районидики иқтисадий қурулушиниң йәрлик хәлқни вәйранчилиққа учритиштин башқа қошна дөләтләргиму еғир хәвп шәкилләндүридиғанлиқини изчил тәкитләп келиватқан иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.