Америкадики хитай тәтқиқатчиси хитайниң уйғурларға 14 милярд доллар төләм төлишини тәвсийә қилди

Мухбиримиз әркин
2020-08-11
Елхәт
Пикир
Share
Принт

Америкадики клеймонт микенна институтиниң профессори, герман маршал фондиниң тәтқиқатчиси пей миншин мақалә елан қилип, хитайниң «шинҗаңдин чиқиш истиратегийәси» гә еһтияҗи барлиқи, униң барлиқ уйғурларни қоюп берип, уларниң һәр биригә 14 миң доллардин җәмий 14 милярд доллар төләм төлишини тәвсийә қилди. Униң тәкитлишичә, хитай өзиниң шинҗаңдики йөнилишини өзгәртмәй, американиң униңға қарши кәң иттипақ қурушиға ярдәм қилмақтикән.

У «хитай шинҗаңдин чиқиш истиратегийәсигә еһтияҗлиқ» мавзулуқ мақалисидә, «бейҗиңниң шинҗаңда ақмайдиған һазирқи сияситидин илгири-кейин болуп ваз кечишкә еһтияҗи чүшидиғанлиқи» ни тәкитлигән. Униң илгири сүрүшичә, бейҗиңниң йүзини сақлап қелишиниң йоли тутқундики барлиқ уйғурларни қоюп бериши, уларниң һәр биригә 14 миң 300 доллардин төләм төләп, турмушини рәткә селивелишиға ярдәм қилиш икән. У, бу пул зиянкәшликкә учриғучиларниң мәниви зийинини толдуралмисиму, лекин буниң тоғра йөнилишкә қарап бесилған қәдәм икәнликини билдүргән.

Униң тәкитлишичә, хитай һөкүмити йәнә уйғурларға узун мәзгиллик малийә тәрәққият ярдими бериши, шинҗаңниң тәбиий байлиқидин тәң бәһримән болуши, илһам тохтини қоюп бериши, уйғурларниң шинҗаң һөкүмитидики орнини күчәйтиши, уйғурларниң мәдәнийитигә һөрмәт қилиши, хитай көчмәнлирини тохтитиши керәк икән. У, бу сиясәт «зораванлиқниң вақитлиқ әвҗ елишини кәлтүрүп чиқириши мумкин болсиму, әмма хитай бихәтәрлик аппаратлириниң ғайәт зор күчини нәзәрдә тутқанда униң шинҗаңда омумйүзлүк исян яки бөлүнүшни пәйда қилишини қияс қилиш тәс» дәп көрсәткән.

Пикирләр (0)
Share
Толуқ бәт