Чәрчән наһийәси кәнт кадирлирини ичкиридин чиққан хитайлар билән толдурушқа башлиған

Мухбиримиз әркин
2018-02-09
Елхәт
Пикир
Share
Принт

Уйғур елиниң чәрчән наһийәси хитай өлкилиридин мәзкур наһийәгә юқири тәминат билән кәнт кадири қобул қилидиғанлиқини елан қилған. Көзәткүчиләрниң илгири сүрүшичә, бу йәрлик кәнт кадирлириниң сиқип чиқирилип, уларниң орниниң хитай кадирлар билән толдурулуватқанлиқидин дерәк беридикән.

Чәрчән наһийәлик тәшкилат бөлүми, адәм байлиқи вә иҗтимаий параванлиқ идарисиниң йеқинда чиқарған бир уқтурушида хитайниң ичкири өлкилиридин 100 нәпәр кәнт кадири қобул қилидиғанлиқини елан қилған.

Чәрчән уйғур аптоном районидики йәр көлими әң чоң наһийә болуп, у 5 иҗтимаий район, 53 мәмурий кәнт вә 6 тәбиий кәнттин тәшкил тапқан. Нопуси 60 миң әтрапидики бу наһийәниң аз кәм 77 пирсәнт аһалисини уйғурлар тәшкил қилидикән. Наһийәлик тәшкилат бөлүми, адәм байлиқи вә иҗтимаий параванлиқ идарисиниң уқтурушида қәйт қилишичә, наһийәлик партком «кәнт кадири йетишмәслик», «хизмәт йүки билән адәм сани маслашмаслиқ» әһвалини көздә тутуп бу қарарни чиқарған икән.

Мәзкур уқтурушта кадирлиққа қобул қилинғанларға аз дегәндә 4000 йүән айлиқ мааш, турмуш пули, өй пули, йол хираҗити, мукапат қатарлиқлар қошулуп, йилиға аз дегәндә 30 миң йүән ярдәм пули берилидиғанлиқи билдүрүлгән. Хитай өлкилиридин қобул қилинидиған кәнт кадирлириниң йәнә олтурақ өй, давалиниш, той қилиш, аилә әзалирини көчүрүп келиш, пәрзәнтлирини мәктәпкә орунлаштуруш қатарлиқ җәһәтләрдә бир қатар етибар бериш сиясәтлиридин бәһримән болидиғанлиқи қәйт қилинған. Лекин уқтурушта йәрликтә ишсизлиқ еғир болсиму, немә үчүн уйғур дияриниң ичидин кадир қобул қилмайдиғанлиқи чүшәндүрүлмигән. Чәтәлдики көзәткүчиләрниң илгири сүрүшичә, даириләрниң мәқсити хитай кадирлирини йөткәп келип шу арқилиқ уйғур йеза-кәнтлирини техиму қаттиқ контрол қилиш икән.

Чәрчән наһийәси илгири бәлгилимә чиқирип, уйғурлар билән хитайлар той қилса һәр хил имтиязлардин бәһримән болидиғанлиқини елан қилған. Әмма униң бу сиясити муһаҗирәттики уйғур паалийәтчиләр тәрипидин «уйғурларни мәҗбурий ассимилятсий болушқа мәҗбурлаш,» дәп тәнқид қилинған иди.

Пикирләр (0)
Share
Толуқ бәт