Cherchen nahiyesi kent kadirlirini ichkiridin chiqqan xitaylar bilen toldurushqa bashlighan

Muxbirimiz erkin
2018-02-09
Élxet
Pikir
Share
Print

Uyghur élining cherchen nahiyesi xitay ölkiliridin mezkur nahiyege yuqiri teminat bilen kent kadiri qobul qilidighanliqini élan qilghan. Közetküchilerning ilgiri sürüshiche, bu yerlik kent kadirlirining siqip chiqirilip, ularning ornining xitay kadirlar bilen tolduruluwatqanliqidin dérek béridiken.

Cherchen nahiyelik teshkilat bölümi, adem bayliqi we ijtima'iy parawanliq idarisining yéqinda chiqarghan bir uqturushida xitayning ichkiri ölkiliridin 100 neper kent kadiri qobul qilidighanliqini élan qilghan.

Cherchen Uyghur aptonom rayonidiki yer kölimi eng chong nahiye bolup, u 5 ijtima'iy rayon, 53 memuriy kent we 6 tebi'iy kenttin teshkil tapqan. Nopusi 60 ming etrapidiki bu nahiyening az kem 77 pirsent ahalisini Uyghurlar teshkil qilidiken. Nahiyelik teshkilat bölümi, adem bayliqi we ijtima'iy parawanliq idarisining uqturushida qeyt qilishiche, nahiyelik partkom "Kent kadiri yétishmeslik", "Xizmet yüki bilen adem sani maslashmasliq" ehwalini közde tutup bu qararni chiqarghan iken.

Mezkur uqturushta kadirliqqa qobul qilin'ghanlargha az dégende 4000 yüen ayliq ma'ash, turmush puli, öy puli, yol xirajiti, mukapat qatarliqlar qoshulup, yiligha az dégende 30 ming yüen yardem puli bérilidighanliqi bildürülgen. Xitay ölkiliridin qobul qilinidighan kent kadirlirining yene olturaq öy, dawalinish, toy qilish, a'ile ezalirini köchürüp kélish, perzentlirini mektepke orunlashturush qatarliq jehetlerde bir qatar étibar bérish siyasetliridin behrimen bolidighanliqi qeyt qilin'ghan. Lékin uqturushta yerlikte ishsizliq éghir bolsimu, néme üchün Uyghur diyarining ichidin kadir qobul qilmaydighanliqi chüshendürülmigen. Chet'eldiki közetküchilerning ilgiri sürüshiche, da'irilerning meqsiti xitay kadirlirini yötkep kélip shu arqiliq Uyghur yéza-kentlirini téximu qattiq kontrol qilish iken.

Cherchen nahiyesi ilgiri belgilime chiqirip, Uyghurlar bilen xitaylar toy qilsa her xil imtiyazlardin behrimen bolidighanliqini élan qilghan. Emma uning bu siyasiti muhajirettiki Uyghur pa'aliyetchiler teripidin "Uyghurlarni mejburiy assimilyatsiy bolushqa mejburlash," dep tenqid qilin'ghan idi.

Toluq bet