Хитай һөкүмити торда “шинҗаңда хизмәт бар” тәшвиқати елип бармақтикән

Мухбиримиз җәвлан
2022.05.04
Share on WhatsApp
Share on WhatsApp

Хитайчә “тәңритағ тори” ниң 3-май күни чиқарған хәвиридә көрситилишичә, уйғур районида өткән бир пәсилдә 790 қетим торда вә нәқ мәйданда хизмәтчи елиш паалийити өткүзүлгән һәмдә 260 миң адәмгә иш орни тәминләнгән.

Хитай даирилири “һәр айда адәм елиш, һәр вақит адәм елиш мулазимити йолға қоюш, торда адәм елишни үзлүксиз давамлаштуруш” пилани бойичә чоң-кичик шәһәрләрдә иш күтүп турғанларни җәлп қилған; “шинҗаңда хизмәт бар” намлиқ торда биваситә тарқитиш программиси ишләп тарқатқан вә бүгүнгичә 41 сан ишләп болған; униңдин башқа, 2022-йил оқуш пүттүридиған алий мәктәп оқуғучилирини торда хизмәткә тонуштурған.

Уйғур аптоном районлуқ “ишқа орунлаштуруш аммиви мулазимәт орни” ниң башлиқи ли җенҗяң буниңдин кейин тор арқилиқ техиму көп адәмни учур вә мулазимәт билән тәминләйдиғанлиқини билдүргән.

Уйғур районидики йиғивелиш лагерлири вә у йәргә қамалғанларни қул әмгикигә селиш һәққидә ашкариланған мәлуматлардин қариғанда, хитай һөкүмити зор көп сандики уйғурларни әслидики хизмәт орнидин, ширкәтлиридин, дуканлиридин, йәрлиридин айрип, лагердики мәһкум қулларға айландуруп қойған. Тәтқиқатчи дәррен байлерниң “шинҗаң немишқа хитай көчмәнлири әң көп җайлашқан мустәмликигә айлинип қалди?” намлиқ мақалисидә көрситилишичә, хитай һөкүмити йәрлик уйғурларни хилму хил қәбиһ сиясәтләр билән вәйран қилип, лагерға солап яки қул ишчи қилип, улардин бош қалған орунларға көчмән хитайларни орунлаштурған, ичкиридә иш күтүп турғанларни юқири тәминат билән җәлп қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.