Хитай даирилири уйғур аптоном райониға давамлиқ көпләп хизмәтчи қобул қилмақта

Мухбиримиз әркин
2019-05-20
Елхәт
Пикир
Share
Принт

Хитай даирилири уйғур аптоном райониға ички өлкиләрдин давамлиқ көпләп хизмәтчи қобул қилмақта. Уйғур аптоном районлуқ адәм күчи вә иҗтимаий параванлиқ назарити йеқинда аптоном район дәриҗилик 70 тәк идарә-җәмийәткә 2431 нәпәр хизмәтчи қобул қилиш елан чиқарған.

Көзәткүчиләрниң илгири сүрүшичә, бу, хитай даирилириниң йеқинқи 2 йил мабәйнидә тутқун қилинип, йиғивелиш лагерлириға әкетилгән 2 милйондәк уйғур, қазақ вә башқа мусулман түркий хәлқләрдин бош қалған орунларни давамлиқ ичкиридин қобул қилған хитайлар билән толдуруватқанлиқини көрситидикән. Хитай һөкүмити йеқинқи йилларда уйғур райониға хизмәтчи қобул қилишта омумйүзлүк ичкири өлкиләргә йүзләнмәктә иди.

«Тәңритағ тори» ниң 20‏-май хәвәр қилишичә, йеңи қобул қилинидиған хизмәтчиләр 2 түркүмгә бөлүп елинидикән. Биринчи түркүмдә 1310 нәпәр, иккинчи түркүмдә 1121 нәпәр хизмәтчи қобул қилинидикән. Хәвәрдә, хизмәтчиләрниң алий мәктәп, аптоном район дәриҗилик партийә-һөкүмәт органлириға, назарәт, иҗтимаий пәнләр академийәси, алий мәктәп вә бәзи кәспий орунларға қобул қилинидиғанлиқи билдүрүлгән. Униңда, миллити, йеши, оқуш тарихи, җинси, нопуси қатарлиқ җәһәтләрдики шәртләргә чүшидиғанлар илтимас қилса болидиғанлиқи тәкитләнгән.

Хитай һөкүмити 2017‏-йили 2‏-айдин башлап уйғурларни кәң көләмлик тутқун қилишқа башлиғандин кейин, нурғун кадирлар вә хизмәтчиләр «икки йүзлимичи», чәтәлгә чиққан, һәҗгә барған дегәндәк сәвәбләр билән тутқун қилинип, партийә-һөкүмәт органлирида, идарә-җәмийәт вә кәспий нурғун орун бош қалған иди. Уйғур кишилик һоқуқ тәшкилатлириниң илгири сүрүшичә, хитай һөкүмити бу бошлуқни ичкиридин хитайларни йөткәп чиқип толдурупла қалмай, бу арқилиқ йәнә уйғур райониниң нопус қурулмисини өзгәртмәктә икән.

Пикирләр (0)
Share
Толуқ бәт