Хитайниң уйғур районида 500 миңдин артуқ пән-техника хизмәтчиси барлиқини илгири сүрүши диққәт қозғиди

Мухбиримиз ирадә
2019-05-30
Елхәт
Пикир
Share
Принт

Хитайниң тәңритағ тори 30-май күни бир хәвәр тарқитип, уйғур аптоном районида җәмий 500 миңдин артуқ пән-техника хизмәтчисиниң уйғур райониниң җәнуб вә шималиға кәң тарқилип хизмәт көрситиватқанлиқини баян қилди.

Хәвәрдә илгири сүрүлүшичә, «йеқинқи йиллардин буян, аптоном районлуқ пән-техника җәмийити пүтүн җәмийәттә әмгәккә, билимгә, ихтисаслиқларға һөрмәт қилидиған, иҗадийәткә һөрмәт қилидиған яхши кәйпиятни бәрпа қилған, түрлүк ихтисаслиқлар бәс-бәстә йеңилиқ яритидиған, иҗад қилидиған яхши вәзийәтни шәкилләндүргән».

Һалбуки чәтәлләрдики уйғур көзәткүчиләр буниң әксини илгири сүрмәктә. Улар йеқинқи йилларда уйғурларниң әң сәрхил зиялийлири вә пән-техника адәмлиригә нишанлиқ һалда қаттиқ зәрбә берилгәнликини билдүрди. Нурғун көзгә көрүнгән билим адәмлири лагерға қамалди, қамақ җазаси вә һәтта өлүм җазаси билән җазаланди.

Теббий пәнләр доктори, профессори халмурат ғопур, җуғрапийә пәнлири доктори, профессор ташполат тейип, профессор раһилә давут вә башқа йүзлигән уйғур илим-пән әрбаблири вә зиялийлар буниң типики мисали болуп, улар еғир җазалашларға, лагерларға қамашқа учриди. Уйғур илим-пән хадимлириниң әркин тәтқиқат елип бериши вә әркин пикир қилиши қаттиқ чәклимигә учриди.

Америкадики уйғур кишилик һоқуқ қурулуши мушу айниң 21-күни «тутқун қилинған вә йоқалған уйғур зиялийлири» ға аит елан қилған 4-қетимлиқ доклатида 2017-йили апрелдин буян тутқун қилинған, җазаға һөкүм қилинған вә мәҗбурий ғайиб қиливетилгән уйғур зиялийлиридин 435 нәпириниң кимликини ениқлап чиққан. Улар доклатида, бу рәқәмниң зиянкәшликкә учраватқан зиялийларниң наһайити аз бир қисми икәнликини әскәрткән.

Бирақ тәңритағ тори хәвиридә, нөвәттә пүтүн шинҗаңда академикләр-мутәхәссисләр хизмәт понкитидин 50и қурулуп, 60 нәччә академик понкитқа кирди; аптоном районлуқ пән-техника җәмийитиниң шу дәриҗилик илмий җәмийәтлириниң коллектип әзаси 10 миңға йәтти, дегән. Көзәткүчиләрниң қаришичә, юқирида тилға елиниватқанлар асасән уйғур елигә келип хизмәт қиливатқан хитайларни көрситидикән.

Пикирләр (0)
Share
Толуқ бәт