Xitayning Uyghur rayonida 500 mingdin artuq pen-téxnika xizmetchisi barliqini ilgiri sürüshi diqqet qozghidi

Muxbirimiz irade
2019-05-30
Share

Xitayning tengritagh tori 30-may küni bir xewer tarqitip, Uyghur aptonom rayonida jem'iy 500 mingdin artuq pen-téxnika xizmetchisining Uyghur rayonining jenub we shimaligha keng tarqilip xizmet körsitiwatqanliqini bayan qildi.

Xewerde ilgiri sürülüshiche, "Yéqinqi yillardin buyan, aptonom rayonluq pen-téxnika jem'iyiti pütün jem'iyette emgekke, bilimge, ixtisasliqlargha hörmet qilidighan, ijadiyetke hörmet qilidighan yaxshi keypiyatni berpa qilghan, türlük ixtisasliqlar bes-beste yéngiliq yaritidighan, ijad qilidighan yaxshi weziyetni shekillendürgen".

Halbuki chet'ellerdiki Uyghur közetküchiler buning eksini ilgiri sürmekte. Ular yéqinqi yillarda Uyghurlarning eng serxil ziyaliyliri we pen-téxnika ademlirige nishanliq halda qattiq zerbe bérilgenlikini bildürdi. Nurghun közge körün'gen bilim ademliri lagérgha qamaldi, qamaq jazasi we hetta ölüm jazasi bilen jazalandi.

Tébbiy penler doktori, proféssori xalmurat ghopur, jughrapiye penliri doktori, proféssor tashpolat téyip, proféssor rahile dawut we bashqa yüzligen Uyghur ilim-pen erbabliri we ziyaliylar buning tipiki misali bolup, ular éghir jazalashlargha, lagérlargha qamashqa uchridi. Uyghur ilim-pen xadimlirining erkin tetqiqat élip bérishi we erkin pikir qilishi qattiq cheklimige uchridi.

Amérikadiki Uyghur kishilik hoquq qurulushi mushu ayning 21-küni "Tutqun qilin'ghan we yoqalghan Uyghur ziyaliyliri" gha a'it élan qilghan 4-qétimliq doklatida 2017-yili apréldin buyan tutqun qilin'ghan, jazagha höküm qilin'ghan we mejburiy ghayib qiliwétilgen Uyghur ziyaliyliridin 435 nepirining kimlikini éniqlap chiqqan. Ular doklatida, bu reqemning ziyankeshlikke uchrawatqan ziyaliylarning nahayiti az bir qismi ikenlikini eskertken.

Biraq tengritagh tori xewiride, nöwette pütün shinjangda akadémikler-mutexessisler xizmet ponkitidin 50i qurulup, 60 nechche akadémik ponkitqa kirdi؛ aptonom rayonluq pen-téxnika jem'iyitining shu derijilik ilmiy jem'iyetlirining kolléktip ezasi 10 minggha yetti, dégen. Közetküchilerning qarishiche, yuqirida tilgha éliniwatqanlar asasen Uyghur élige kélip xizmet qiliwatqan xitaylarni körsitidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet