Ши җинпиң алий мәктәп оқуғучилириға мәктуп йезип уларни уйғур елидә йилтиз тартишқа чақирған

Мухбиримиз ирадә
2020-07-09
Елхәт
Пикир
Share
Принт

Йеқиндин буян хитайниң «шинҗаң гезити» вә «тәңритағ тори» қатарлиқ тор бәтлиридә хитай дөләт рәиси ши җинпиңниң бейҗиңдики нефит университетиниң қарамайдики шөбисини пүттүргән алий мәктәп оқуғучилириға язған бир парчә хети кәң тәшвиқ қилинмақта.

Хәвәрләрдин қариғанда ши җинпиң хетидә юқиридики мәктәпни пүттүргән оқуғучиларниң уйғур елидә қелип, асасий қатламда хизмәт қилишни таллиғанлиқини мәдһийәлигән болуп, буниң нәтиҗисидә һазир ши җинпиңниң хетиниң роһини өгиниш долқуни көтүрүлгән.

Уйғур аптоном районлуқ партком секретари чен чүәнго 7-айниң 8-күни, мәхсус қарамайдики мәктәп райониға йетип берип сөз қилған. Диққәт қозғайдиғини, у шу күндики сөзидә алий мәктәп пүттүргән оқуғучиларни тарихий бурчни зиммисигә елип уйғур елидә йилтиз тартип қелишқа чақирған. У буни «җуңго арзусиниң шинҗаң сәһиписини пүтүшниң асаси», дәп көрсәткән.

Чен чүәнго сөзидә төвәндикидәк ибариләрни қолланған: «. . . Алий мәктәп оқуғучилири бурчни дадил зиммигә елип, дөләтни сөйүш, шинҗаңни сөйүшни өмүрлүк етиқади қилип, тоғраққа охшаш вәтинимизниң ғәрбий қисмидики чегра районда йилтиз тартиши керәк. Чегра районни қизғин сөйидиған, чегра районни муһапизәт қилидиған, чегра районға өзини беғишлайдиған җәңгивар қошунға айлиниши керәк».

Хитай дөләт рәиси ши җинпиңниң биваситә һалда алий мәктәп пүттүргән оқуғучиларни уйғур елидә йилтиз тартишқа сәпәрвәрлик қилиши диққәт қозғиди. Чәтәлләрдики уйғур көзәткүчиләр буни уйғур елидә 3 милйондин артуқ уйғур қатарлиқ йәрлик милләтләр лагерларға қамалған вә қалған яш әмгәк күчлири һәдәп уйғур елиниң ичи вә сиртида мәҗбурий әмгәккә тутулуватқан бир шараитта хитайларни уларниң орунлириға йөткәштики муһим истратегийәлик пилан болуши мумкин, дәп мөлчәрлимәктә.

Пикирләр (0)
Share
Толуқ бәт