Хитай һөкүмити хитай яшлирини «шинҗаңда йәрлишиш» кә чақирмақта

Мухбиримиз нуриман
2020-07-15
Елхәт
Пикир
Share
Принт

12-Июл күни уйғур аптоном районлуқ парткомниң орган гезити болған «шинҗаң гезити» дә «шинҗаңға йәрлишәйли, бу йәрдә кәңри дуня бар» намлиқ бир парчә мақалә елан қилинған.

Мақалидә дейилишичә «шинҗаңға икки йиллиқ ярдәм» гә кәлгән бир хитай алий мәктәп оқуғучиси вәзиписини түгәткәндин кейин шинҗаңда давамлиқ қилишқа тизимлатқан. У «шинҗаң гезити» мухбириниң зияритини қобул қилип, хотәндики 8-синип оқуғучилириниң әдәбият дәрси нәтиҗилириниң наһайити төвәнликини, өзиниң бундин кейин уларни тәрбийиләп чиқидиғанлиқини билдүргән.

Мәлум болушичә, 2016-йилидин башлап уйғур аптоном райониниң барлиқ шәһәр вә йиза-қишлақлирида йәслидин тартип асасий маарип системисидики барлиқ оқутуш материяллри хитайчиға өзгәртилгән болуп, уйғур тили мәктәпләрниң оқу-оқутушидин сеқип чиқирилған. Буниң билән хитай өлкилиридин нәччә он миңлиған хитай яшлири уйғур райониниң маарип саһәсигә юқири тәминат билән оқутқучилиққа тәклип қилинип, уйғур миллий маарипи толуқ хитайчилаштурулушқа башлиған.

Хитай дөләт рәиси ши җинпиң йеқинда хитай алий мәктәп оқуғучилириға очуқ хәт йезип, оқуш пүттүргән оқуғучиларни уйғур районида йилтиз тартишқа сәпәрвәрлик қилған иди.

Йеқинқи йиллардин буян көплигән ахбарат қаналлири уйғур илидики оқуш пүттүргән вә қорамиға йәткән яш уйғур оғул-қизлирини «ишқа орунлаштуруш» баһанисидә хитайниң ички өлкилиридики шәһәр-базарларға йөткәватқанлиқини хәвәр қилған иди.

«Шинҗаң гезити» дә бесилған бу мақалидә йәнә бу хитай яшниң хотән тавакөл базарлиқ башланғуч мәктәптә оқутқучилиқ қилғанда уйғур оқуғучиларниң өзини «дада» дәп чақирғанлиқини тилға алған.

Радийомизниң бу йил апирилдики хәвиригә асасланғанда, хитай һөкүмити 2017-йилидин башлап милйонлиған уйғурни тутқун қилған, уларниң қаранчуқсиз қалған балилирини ятақлиқ мәктәпләргә орунлаштуруп, хитай оқутқучиларниң тәрбийәлишигә тутуп бәргән.

Пикирләр (0)
Share
Толуқ бәт