Xitay hökümiti xitay yashlirini "Shinjangda yerlishish" ke chaqirmaqta

Muxbirimiz nur'iman
2020-07-15
Élxet
Pikir
Share
Print

12-Iyul küni Uyghur aptonom rayonluq partkomning organ géziti bolghan "Shinjang géziti" de "Shinjanggha yerlisheyli, bu yerde kengri dunya bar" namliq bir parche maqale élan qilin'ghan.

Maqalide déyilishiche "Shinjanggha ikki yilliq yardem" ge kelgen bir xitay aliy mektep oqughuchisi wezipisini tügetkendin kéyin shinjangda dawamliq qilishqa tizimlatqan. U "Shinjang géziti" muxbirining ziyaritini qobul qilip, xotendiki 8-sinip oqughuchilirining edebiyat dersi netijilirining nahayiti töwenlikini, özining bundin kéyin ularni terbiyilep chiqidighanliqini bildürgen.

Melum bolushiche, 2016-yilidin bashlap Uyghur aptonom rayonining barliq sheher we yiza-qishlaqlirida yeslidin tartip asasiy ma'arip sistémisidiki barliq oqutush matériyallri xitaychigha özgertilgen bolup, Uyghur tili mekteplerning oqu-oqutushidin séqip chiqirilghan. Buning bilen xitay ölkiliridin nechche on minglighan xitay yashliri Uyghur rayonining ma'arip sahesige yuqiri teminat bilen oqutquchiliqqa teklip qilinip, Uyghur milliy ma'aripi toluq xitaychilashturulushqa bashlighan.

Xitay dölet re'isi shi jinping yéqinda xitay aliy mektep oqughuchilirigha ochuq xet yézip, oqush püttürgen oqughuchilarni Uyghur rayonida yiltiz tartishqa seperwerlik qilghan idi.

Yéqinqi yillardin buyan köpligen axbarat qanalliri Uyghur ilidiki oqush püttürgen we qoramigha yetken yash Uyghur oghul-qizlirini "Ishqa orunlashturush" bahaniside xitayning ichki ölkiliridiki sheher-bazarlargha yötkewatqanliqini xewer qilghan idi.

"Shinjang géziti" de bésilghan bu maqalide yene bu xitay yashning xoten tawaköl bazarliq bashlan'ghuch mektepte oqutquchiliq qilghanda Uyghur oqughuchilarning özini "Dada" dep chaqirghanliqini tilgha alghan.

Radiyomizning bu yil apirildiki xewirige asaslan'ghanda, xitay hökümiti 2017-yilidin bashlap milyonlighan Uyghurni tutqun qilghan, ularning qaranchuqsiz qalghan balilirini yataqliq mekteplerge orunlashturup, xitay oqutquchilarning terbiyelishige tutup bergen.

Toluq bet