Korla shehiridiki yeslilerge zor sanda oqughuchi qobul qilish guman qozghidi

Korla sheherlik hökümetning tor bétide 10-awghust chiqirilghan uqturushta sheher tewesidiki herqaysi yeslilerge bu yil küz peslide 3300 din artuq oqughuchi qobul qilinidighanliqi bildürülgen.

Xewerde éytilishiche, bu yil korla shehiride yéngidin 12 yesli échilghan bolup, buning 2020-yili birdinla éship ketken éhtiyajni qandurush meqsitide qurulghanliqi éytilghan. Oqughuchilarning tor arqiliq tizimlatsa bolidighanliqimu bu yilqi yéngiliqlarning biri iken.

Halbuki, yéqinqi mezgillerde barghanséri zor diqqet qozghawatqan Uyghur diyaridiki mejburiy emgek mesiliside lagér ichi we sirtidiki nurghun Uyghurlarning, jümlidin ayallarning baliliridin ayrilip “Emgek küchliri” bolup xitay zawutlirigha yolliniwatqanliqi, shuningdek xitay hökümitining “Heqsiz yesli” qatarliq alahide étiwar bérish siyasetliri bilen zor sanda ichkiridin kespiy orunlargha xizmetchi qobul qilish heqqide élan chiqiriwatqanliqi melum bolghan idi.

Bir qisim analizchilar mushu ehwalgha asasen korladiki yéngi yesliler we oqughuchilar sanining birdinla éship kétish hadisisini mushu xil ré'alliqning inkasi bolushi mumkin, déyishmekte.