Уйғур райониға көпләп хитай оқутқучи сәпләнмәктә

Мухбиримиз җәвлан
2020-09-09
Share

Хитайчә "тәңритағ тори" ниң 9-сентәбир хәвәр қилишичә, уйғур районида "алаһидә хизмәт орни пилани" иҗра қилинғиниға бу йил 15 йил болидикән. Уйғур райони бу пиланға асасән 2019-йилғичә 99 миң 200 нәпәр оқутқучини тәклип қилған болуп, буларниң ичидә 70 пирсәнтидин көпрәки йеза-қишлақлардики мәктәпләрдә ишләйдикән. Нөвәттә 2020-йиллиқ оқутқучи тәклип қилиш хизмити давамлиқ ишләнмәктә икән.

Тәклип қилинған оқутқучилар асасән дегүдәк хитай оқутқучилар болуп, буларниң көпинчисиниң ичкири хитай өлкиләрдин кәлгәнлики мәлум. Мәзкур хәвәрдә 2012-йил хебейдин корлаға келип оқутқучилиқ қилған җав йүхуа исимлик бир аял оқутқучиниң иш-излирини тонуштурулған. Униң ейтишичә, дәсләптә кәлгәндә ишқа орунлашқан оқутқучилар 20 дин көп болған болса, һазир 60 тин ешип кәткән, көпинчиси яшлар икән.

Уйғур аптоном районлуқ маарип назаритидики хадимниң билдүрүшичә, "алаһидә хизмәт орни пилани" йолға қоюлған 15 йилда омумән җәнубтики 4 вилайәт-областқа ярдәм бериш асас қилинған болуп, 2019-йилғичә бу вилайәтләргә сәпләнгән оқутқучилар 61 миң 700 гә йәткән.

Хитайчә "шинҗаң гезити" тори тарқатқан бир хәвәрдиму уйғур районидики һәр дәриҗилик мәктәпләргә сәпләнгән оқутқучиларниң 237 миң 090 гә йәткәнлики, буниң ичидә 2017-йилдин 2019-йилғичә пүтүн хитай тәвәсидин "алаһидә хизмәт орни" пилани бойичә қобул қилған оқутқучиларниң 130 миң 740 нәпәр икәнлики тилға елинған. Йәнә йеқинқи 3 йил ичидә йәсли, башланғуч мәктәп вә оттура мәктәпләрдики оқутқучи вә мәктәп мудирлириниң 300 миң адәм қетимдин артуқ тәрбийәлинип, кәспий вә универсал сапасиниң өстүрүлгәнлики ейтилған.

Анализчиларниң билдүрүшичә, хитай 2000-йил уйғур районида "қош тил маарипи" ни йолға қоюп, уйғур тилини маарип саһәсидин пүтүнләй чиқирип ташлиғандин тартип уйғур тилини чәкләшкичә болған 20 йил мабәйнидә уйғур оқутқучиларни пәйдин-пәй иш орнидин айриған болуп, уларниң орниға ичкири өлкиләрдин түркүм-түркүмләп хитай оқутқучиларни алаһидә етибар билән қобул қилған, шуниң билән биргә уйғур районидики хитай нопусини көпәйткән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт