Uyghur rayonigha köplep xitay oqutquchi seplenmekte

Muxbirimiz jewlan
2020-09-09
Élxet
Pikir
Share
Print

Xitayche "Tengritagh tori" ning 9-séntebir xewer qilishiche, Uyghur rayonida "Alahide xizmet orni pilani" ijra qilin'ghinigha bu yil 15 yil bolidiken. Uyghur rayoni bu pilan'gha asasen 2019-yilghiche 99 ming 200 neper oqutquchini teklip qilghan bolup, bularning ichide 70 pirsentidin köpreki yéza-qishlaqlardiki mekteplerde ishleydiken. Nöwette 2020-yilliq oqutquchi teklip qilish xizmiti dawamliq ishlenmekte iken.

Teklip qilin'ghan oqutquchilar asasen dégüdek xitay oqutquchilar bolup, bularning köpinchisining ichkiri xitay ölkilerdin kelgenliki melum. Mezkur xewerde 2012-yil xébéydin korlagha kélip oqutquchiliq qilghan jaw yüxu'a isimlik bir ayal oqutquchining ish-izlirini tonushturulghan. Uning éytishiche, deslepte kelgende ishqa orunlashqan oqutquchilar 20 din köp bolghan bolsa, hazir 60 tin éship ketken, köpinchisi yashlar iken.

Uyghur aptonom rayonluq ma'arip nazaritidiki xadimning bildürüshiche, "Alahide xizmet orni pilani" yolgha qoyulghan 15 yilda omumen jenubtiki 4 wilayet-oblastqa yardem bérish asas qilin'ghan bolup, 2019-yilghiche bu wilayetlerge seplen'gen oqutquchilar 61 ming 700 ge yetken.

Xitayche "Shinjang géziti" tori tarqatqan bir xewerdimu Uyghur rayonidiki her derijilik mekteplerge seplen'gen oqutquchilarning 237 ming 090 ge yetkenliki, buning ichide 2017-yildin 2019-yilghiche pütün xitay tewesidin "Alahide xizmet orni" pilani boyiche qobul qilghan oqutquchilarning 130 ming 740 neper ikenliki tilgha élin'ghan. Yene yéqinqi 3 yil ichide yesli, bashlan'ghuch mektep we ottura mekteplerdiki oqutquchi we mektep mudirlirining 300 ming adem qétimdin artuq terbiyelinip, kespiy we uniwérsal sapasining östürülgenliki éytilghan.

Analizchilarning bildürüshiche, xitay 2000-yil Uyghur rayonida "Qosh til ma'aripi" ni yolgha qoyup, Uyghur tilini ma'arip sahesidin pütünley chiqirip tashlighandin tartip Uyghur tilini chekleshkiche bolghan 20 yil mabeynide Uyghur oqutquchilarni peydin-pey ish ornidin ayrighan bolup, ularning ornigha ichkiri ölkilerdin türküm-türkümlep xitay oqutquchilarni alahide étibar bilen qobul qilghan, shuning bilen birge Uyghur rayonidiki xitay nopusini köpeytken.

Toluq bet