"Brown siyasiy obzori" zhurnili Uyghurlarning siyasiy teqdiri heqqide toxtaldi

Muxbirimiz shöhret hoshur
2018-11-15
Élxet
Pikir
Share
Print

Amérikidiki brown uniwérsitéti teripidin chiqirilidighan "Brown siyasiy obzori" zhurnili bügün Uyghurlar heqqide élan qilghan maqaliside Uyghur mesilisining yiltizi we uni hel qilish charisi heqqide toxtalghan.

Maqalining bash qismida Uyghur rayonida yillardin béri üzülmey yüz bérip kéliwatqan qarshiliq heriketlirining özila xitayning bu rayondiki igidarchiliqigha nisbeten guman peyda qilidighanliqini ilgiri sürgen.

Maqalida yene xitayning lagérlar mesilisini deslepte inkar qilishtin axirida "Esebiylikke qarshi ülgilik orun" qilip körsitishige qeder nöwettiki weziyet tepsiliy bayan qilin'ghan.

Maqalining axirida Uyghur rayonidiki mesilini hel qilishning tüp yolining shu yerdiki milletlerning siyasiy teqdiri üstide qaytidin oylinish ikenliki otturigha qoyulghan.

Uyghurlarning xitaydin ayrilishtin ibaret bir heqqaniy telipining barliqi, emma nöwettiki weziyette xitayning bu menpe'etlik zémindin waz kéchishining qéyinliqi eskertilgen maqalida eger xitayning meylige qoyuwétilse Uyghur rayondiki milletlerning pütünley yoqilish xewpige duch kélidighanliqi eskertilgen.

Maqalida yene mesilini hel qilish charisi süpitide Uyghur rayoni xitayning gherbiy chégrasi bolup qéliwérishi, yerlik xelqlerning iradisi étibargha élin'ghan yéngi bir hökümetning qurulushi, bu hökümetning yer bayliqliri, adem küchi we köchmenler ishliri qatarliq barliq ishlarda merkezdin musteqil halda qarar bérish hoquqi bolushi kérekliki tewsiye qilin'ghan.

Tonushturulushiche, "Brown siyasiy obzori" zhurnili 2012‏-yilidin bashlap neshr qiliniwatqan pesillik siyasiy tetqiqat zhurnilidur.

Toluq bet