Америка армийәсиниң уйғур лейтинанти илғар офитсер болуп баһаланди

Мухбиримиз әркин
2018.05.11
Share on WhatsApp
Share on WhatsApp

Америка армийәсиниң бир уйғур лейтинанти 10‏-май америка армийәсиниң яш илғар офитсери болуп баһалинип, тәқдирләнди.

Шәпқәт ғәйрәт тохти 2013‏-йили алий мәктәпниң биринчи йиллиқидин башлап америка армийәсигә қатнишип, өзиниң бакалаврлиқ унвани билән 4 йиллиқ “америка офитсер тәрбийәләш программиси” ни бирла вақитта тамамлап, 2017‏-йили 5‏-айда, 2-дәриҗилик лейтинантлиқ унваниға еришкән вә шу йили 6-айда актип вәзипә өтәшкә башлиған иди.

Форт бәнниң һәрбий базиси 10‏-май иҗтимаий таратқуларда шәпқәт тохти һәққидә елан қилған тонуштурушида, “биз америка армийәси сепидики асиялиқ америкилиқларни вә тинч окянлиқларниң төһпилири һәм бәргән қурбанлирини әсләймиз вә тәбрикләймиз. Шуларниң бири болған 2‏-дәриҗилик лейтинант шәпқәт ғәйрәт тохти билән тонушуп чиқайли. Униң аилиси хитайниң ғәрбий шималидики шинҗаң районидин кәлгән болуп, уйғур миллитидин болиду. Шәпқәт тохти йеқинда, ‛америка армийәси танкичилар мәктипи‚ ни тамамлап, һазир ‛зәрбидарлар әтрити офитсерлар мәктипи‚ гә бериш алдида турмақта.” дейилгән.

Форт бәнниң һәрбий базисиниң тонуштурушида шәпқәт тохтиниң сөзи нәқил кәлтүрүлгән болуп, у: “мән җәмийитим вә уйғурлуқ әнәнәмгә вәкиллик қилиш пурситини бәргән бу дөләт үчүн һәрбий мәҗбурийитимни ада қилалиғанлиқимдин пәхирлинимән” дегән.

У америка армийәсидә вәзипә өтигән тунҗи уйғур болмисиму, лекин америкидики йеңи әвлад уйғур яшлириниң ичидә лейтинантлиқ унвани алған вә илғар офитсер, дәп баһаланған тунҗи уйғурдур.

Уйғурларниң америка дөләт мудапиәси саһәсидә вәзипә өтиши 1950‏-йиллардин башлиниду. Подполковник давут ришат осман өткән әсирниң 50-70-йиллири узун мәзгил америка дөләт мудапиә министирлиқида тәрҗиман вә истихбарат хадими болуп ишлигән. У 1998‏-йили вапат болған иди. Лейтинант шәпқәт тохти 5 йерим яш вақтида аилиси билән америкиға кәлгән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт