Amérika armiyesining Uyghur léytinanti ilghar ofitsér bolup bahalandi

Muxbirimiz erkin
2018-05-11
Élxet
Pikir
Share
Print

Amérika armiyesining bir Uyghur léytinanti 10‏-may amérika armiyesining yash ilghar ofitséri bolup bahalinip, teqdirlendi.

Shepqet gheyret toxti 2013‏-yili aliy mektepning birinchi yilliqidin bashlap amérika armiyesige qatniship, özining bakalawrliq unwani bilen 4 yilliq "Amérika ofitsér terbiyelesh programmisi" ni birla waqitta tamamlap, 2017‏-yili 5‏-ayda, 2-derijilik léytinantliq unwanigha érishken we shu yili 6-ayda aktip wezipe öteshke bashlighan idi.

Fort benning herbiy bazisi 10‏-may ijtima'iy taratqularda shepqet toxti heqqide élan qilghan tonushturushida, "Biz amérika armiyesi sépidiki asiyaliq amérikiliqlarni we tinch okyanliqlarning töhpiliri hem bergen qurbanlirini esleymiz we tebrikleymiz. Shularning biri bolghan 2‏-derijilik léytinant shepqet gheyret toxti bilen tonushup chiqayli. Uning a'ilisi xitayning gherbiy shimalidiki shinjang rayonidin kelgen bolup, Uyghur millitidin bolidu. Shepqet toxti yéqinda, 'amérika armiyesi tankichilar mektipi' ni tamamlap, hazir 'zerbidarlar etriti ofitsérlar mektipi' ge bérish aldida turmaqta." déyilgen.

Fort benning herbiy bazisining tonushturushida shepqet toxtining sözi neqil keltürülgen bolup, u: "Men jem'iyitim we Uyghurluq en'enemge wekillik qilish pursitini bergen bu dölet üchün herbiy mejburiyitimni ada qilalighanliqimdin pexirlinimen" dégen.

U amérika armiyeside wezipe ötigen tunji Uyghur bolmisimu, lékin amérikidiki yéngi ewlad Uyghur yashlirining ichide léytinantliq unwani alghan we ilghar ofitsér, dep bahalan'ghan tunji Uyghurdur.

Uyghurlarning amérika dölet mudapi'esi saheside wezipe ötishi 1950‏-yillardin bashlinidu. Podpolkownik dawut rishat osman ötken esirning 50-70-yilliri uzun mezgil amérika dölet mudapi'e ministirliqida terjiman we istixbarat xadimi bolup ishligen. U 1998‏-yili wapat bolghan idi. Léytinant shepqet toxti 5 yérim yash waqtida a'ilisi bilen amérikigha kelgen idi.

Toluq bet