Йеңи зеландийәлик зәйтун топ чолпини мәсут өзилниң уйғурлар һәққидики сөзини қоллиди

Мухбиримиз әркин
2019-12-23
Елхәт
Пикир
Share
Принт

Йеңи зеландийәниң атақлиқ зәйтун топ чолпини соний бил виллиямис германийәлик путбол чолпини мәсут өзилниң уймурла һәққидики сөзини қоллап, хитайниң уйғурларниң кишилик һоқуқини дәпсәндә қиливатқанлиқини тәнқид қилған.

Соний бил виллиямис 23‏-декабир күни өзиниң тивиттерида хитайниң бәш юлтузлуқ қизил байриқида боялған бир қолниң ай юлтузлуқ шәрқий түркистан байриқида боялған йәнә бир қолни қаттиқ сиқип қанға бойиғанлиқ һәққидики бир сизма рәсим елан қилип, «бизниң инсанлиқниң орниға иқтисадий мәнпәәтни таллишимиз ечинишлиқтур,» дәп язған.

Германийәлик түрк путбол чолпини, әнглийә «арсенал» кулубиниң путболчиси мәсут өзил йеқинда хитай билән уйғур мәсилисигә сүкүт қиливатқан мусулман дөләтлирини әйибләп, уйғур районида «қуран көйдүрүлүватқан, мәсчитләр чеқиливатқан, мәдрисиләр чәклиниватқан, (мусулман) қериндашлар лагерларға қамиливатқан» болсиму, лекин мусулман әллириниң буниңға сүкүт қилип, зуван сүрмәйватқанлиқини әйиблигән иди.

Мәсут өзилниң сөзи хитайни қаттиқ биарам қилған. Хитай ташқи ишлар министирлиқи дәрһал баянат елан қилип, мәсут өзилниң «сахта хәвәрләр» ниң аздурушиға учрап кәткәнликини илгири сүргән шундақла мәсут өзил хитайдики бир путбол видейо оюнидин чиқириветилгән иди.

2009‏-Йили ислам диниға кирип, мусулманлиқни қобул қилған соний бил виллиямис нөвәттә дунядики әң яхши әнглийә зәйтун топ оюнчиси, дегән баһаға еришкән кишидур. Униң 23-декабир күни тиветтерда мәсут өзилни қоллиши нопузлуқ хәлқара таратқуларда хәвәр қилинди.

Пикирләр (0)
Share
Толуқ бәт