Özbékistanning yéngi nöwetlik prézidént namzatliri békitilgen

Muxbirimiz qutlan
2016-10-29
Share


Islam kerimofning ölümidin kéyin, özbékistanning yéngi nöwetlik prézidéntliqini zadi kimning ötküziwalidighanliqi közetküchilerning diqqet nuqtisida turup kelgen idi. Chünki yéngi nöwetlik özbek prézidéntining heqiqiy we démokratik saylam arqiliq hoquq tapshuriwélishi islam kerimof dewride ottura asiyadiki eng mustebit döletke aylan'ghan özbékistanning démokratiyelishish yoligha méngishining bishariti bolup qalatti.

Özbékistan dölet taratqulirining xewirige qarighanda, 28 - öktebir küni özbékistan merkizi saylam komitéti yighin échip, 12 - ayning 4 - küni ötküzilidighan özbékistanning yéngi nöwetlik prézidént saylimigha qatnishish salahiyitige ige namzatlarni tallap chiqqan.

Igilinishiche, özbékistan merkizi saylam komitéti özbékistandiki töt partiyedin jem'iy töt neper prézidént namzatini tallap chiqqan bolup, ular "Milliy tereqqiyat démokratik partiyesi" din serwer seydullayéf, "Tedbirkarlar we aqillar herkiti erkin démokratik partiyesi" din shewket mirzayéf, "Xelq démokratik partiyesi" din hatemjan abdurahmanof we "Adalet sotsiyal démokratik partiyesi" din neriman mejitof qatarliqlar iken.

Prézidént namzatliqigha körsitilgen bu 4 neper namzat bügün, yeni 29 - öktebirdin bashlap özbékistandiki herqaysi metbu'at we axbaratlarda hemde ammiwiy taratqularda saylam teshwiqatlirini resmiy bashlaydiken. Özbékistan merkizi saylam komitétining 4 - dékabirda ötküzilidighan prézidént saylimigha yawrupa xewpsizlik we hemkarliq teshkilatini nazaretchilikke teklip qilghanliqi melum.

Közetküchiler, özbékistan saylam komitétining bu qétimliq prézidént saylimini démokratik usulda ötküzüshke körünüsh hazirlawatqanliqini, emeliyette 4 - dékabirdiki prézidént saylimining netijisi pütünley dégüdek hazir waqitliq hoquq yürgüziwatqan bash ministér shewket mirzayéfning iradisi boyiche boluwatqanliqini ilgiri sürmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet