Кәримофтин кейинки өзбекистанниң сиясий атмосферасида тәдриҗий һалда юмшаш көрүлмәктә

Мухбиримиз қутлан
2017-02-18
Share

Өзбекистанни аз кәм 30 йилға йеқин қаттиқ қоллуқ билән башқурған диктатор ислам кәримофниң өлимидин кейин, оттура асиядики бу йепиқ әлдә тәдриҗий һалда мәлум өзгиришләрниң болуватқанлиқи билинмәктә.

Өткән йили 12-айда рәсмий тәхткә чиққан шавкәт мирзайефниң кәримоф дәвридә киричи тартилған сиясий атмосферани аста-аста қоюп беришкә, өлүк һаләттики дөләт иқтисадини қайта җанландурушқа тиришиватқанлиқи мәлум.

Азадлиқ радийосиниң хәвиригә қариғанда, ислам кәримоф тәрипидин 1998-йили қамаққа елинған банкир рустәм османоф 19 йилдин кейин, йәни бу йил 2-айниң 15-күни қоюп берилгән.

Рустәм османоф өзбекистан мустәқил болғандин кейин өз алдиға шәхсий банка ачқан киши болуп, кейинчә президент кәримоф уни өзигә тәһдит һесаблап қамаққа алған вә қарақалпақ аптоном җумһурийити тәвәсидики җаслиқ түрмисигә қамивәткән.

Азадлиқ радийосиниң билдүришичә, шавкәт мирзайеф кәримоф дәвридә чәтәлләргә кетишкә мәҗбур болған өзбек муһаҗирлирлини вәтинигә қайтишқа дәвәт қилған. Буниң ипадиси сүпитидә рустәм османофқа охшаш бир қисим сиясий мәһбусларни түрмидин қоюп бәргән.

Өткән һәптә техи президент шавкәт мирзайефниң өзбекистан уйғур мәдәнийәт мәркизигә ташкәнт шәһиридин мәхсус җай аҗратқанлиқи вә 9 миң америка доллири қиммитидики иқтисадий ярдәм бәргәнлики хәвәр қилинған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт