Өзбекистан президенти академикларға мәхсус пул тарқатқан

Мухбиримиз үмидвар
2017-01-01
Share


2016-Йили 9-айда өзбекистанни 30 йилға йеқин идарә қилған президент ислам кәримоф вапат болғандин кейин, 12-айда өзбекистан президентилиқ вәзиписигә сайлинип, һакимийәтни игилигән президент шавкәт мирзияйев йеңи йил һарписида өзбекистан илим-пән саһәсидә тонулған 100 гә йеқин академик билән мәхсус учришиш өткүзгәндә уларға пул тарқатқан.

Б б с агентлиқиниң хәвәр қилишичә, учришиш мурасимида президент шавкәт мирзияйевниң ярдәмчилири 100 гә йеқин пешқәдәм академикниң һәр биригә 1000 америка доллири қиммити 6 йерим милйон сом қачиланған қәғәз қута бәргән болуп, академиклар күтүлмигән бу совғидин хуш болушқан.

Хәвәрдә дейилишичә шавкәт мирзияйевниң башқа саһәдикиләр билән болған учришишлиридиму әнә шундақ шәкилдә пул совғилири тарқитилғанлиқи мәлум болған.

Шавкәт мирзияйев академикларни илим-пән тәрәққиятини илгири сүрушкә чақирған.

Мәлум болушичә, өзбекистан пәнләр академийисидә 20 нәччә йилдин буян академикларни сайлаш елип берилмиған һәмдә академийиси ислаһат қилиш күтүп турулмақта икән.

Өзбекистан пәнләр академийиси сабиқ совет иттипақиниң дәсләпки йиллирида оттура асия районида қурулған тунҗи академийә болуп, әслидә күчлүк илмий тәтқиқат системиси болған. Әмма, совет иттипақиниң йимирилишидин кейин, иқтисадниң чекиниши милйонлиған өзбекистанлиқларниң русийә вә башқа әлләргә кетип тирикчилик қилиш йолини таллишиға сәвәб болған. Илим саһәсидикиләрниң маашиниң төвәнликиму пән-техника тәрәққиятиниң чекинишиидики сәвәбләргә айланған.

Нөвәттә, йеңи президент мирзияйевтин ислам кәримоф дәвридики демократийәгә қарши ички сиясәтни ислаһат қилиш вә дөләт иқтисади тәрәққиятини илгири сүрүш үмид қилиниватқанлиқи мәлум.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт