Tajsiman wirusning lagérlargha tehdit boluwatqanliqi dawamliq diqqet qozghimaqta

Muxbirimiz eziz
2020-05-12
Élxet
Pikir
Share
Print

Pütün dunyagha yamrawatqan tajsiman wirusi waba süpitide alliqachan töt milyondin artuq kishige yuqup bolghanda buning xitay lagérliridiki milyonlighan Uyghurgha éghir tehdit boluwatqanliqi yene bir qétim diqqet qozghidi. "Fokus xewerliri" ning 12-maydiki xewiride éytilishiche, lagér heqqidiki melumat tashqi dunyagha köplep melum boluwatqandimu bir qisim döletlerning xitay bilen "Da'imqidek soda alaqiside bolushi" lagérlarning dawamliq mewjut bolushi hemde bu jaydiki mehbuslarning wirus hujumigha uchrishigha shara'it yaritip bermekte iken.

Awstraliyediki jéymis kuk uniwérsitétining sehiye we saghlamliq penliri tetqiqatchisi anna xayés bu heqte muxbirning ziyaritini qobul qilghanda xitaydiki "Ishlepchiqirishni eslige keltürüsh" dolqunigha egiship lagérlardiki mejburiy emgekningmu eslige kéliwatqanliqini, buning bilen tajsiman wirusning tarqilishigha yéngidin shara'it hazirliniwatqanliqini bildürgen. U bu heqte söz qilip "Lagérlardiki wirus yuqumi yéngidin tutqun qilin'ghanlar yaki xojayinlar yaki taziliq ishchiliri dégendek sirtta yuqumlinip bolghan kishilerning wasitisi bilen lagérlargha tarqilishi mumkin" dégen.

Annaning bildürüshiche, lagérlardiki turmush shara'itining nacharliqi wirusning köplep yamrishigha eng zor derijide shara'it yaritip béridiken. Yene kélip nechche onlighan kishining bir kamérgha qamap qoyulushi seweblik wirus birla kishige yuqsa hemmeylenning yuqumlinishi kélip chiqidiken. Emma hazirghiche xitay hökümitining wirus heqqidiki uchurlarni qattiq kontrol qilishi seweblik lagérlardiki wirus yuqumi heqqidiki melumatlar yoqning ‍ornida iken.

Halbuki, xitay hökümiti tashqi dunyaning lagérlar heqqidiki bu xil eyibleshlirini ret qiliwatqan bolup, téxi yéqinda lagérlardiki wirus tehditi heqqide pikir qilghan Breitbart News agéntliqini "Uchigha chiqqan ongchilliq bilen irqchiliq qilmaqta, shundaqla musulmanlargha qarshi teshwiqatqa köplep orun ajratmaqta" dep tenqidligen.

Toluq bet