Missuri shitati xitay hökümiti üstidin sotqa erz sundi

Missuri shitati xitay hökümitining tajsiman wirusidiki jawabkarliqini eyiblep, bu heqte yézilghan erznamini sotqa tapshurdi. Buning bilen missuri shitati amérikada bu heqte resmiy erz sun'ghan tunji shitat bolup qaldi.

En'gliyede chiqidighan “Kündilik pochta” gézitining 21-apréldiki xewiride éytilishiche, bu amérikadiki shexslerning xitay hökümiti üstidin erz qilishidin zor derijide perqlinidighan bir weqe iken.

Xewerde éytilishiche, missuri shitati xitay hökümitining missuri shitatida körülgen zor sandiki ölüm-yitim weqesige jawabkar bolushi lazimliqini, chünki buning xitay hökümitining wirus heqqidiki uchurlarni tashqi dunyadin gherezlik halda yoshurushi bilen biwasite munasiwetlik ikenlikini tekitligen. Erznamide “Xitay hökümitining yalghanchiliqi seweblik biz judaliq, rohiy zerbe, iqtisadiy weyranchiliq we ghayet zor matemge giriptar bolduq,” déyilgen.

Missuri shtatliq edliye nazaritining naziri, bash teptish érik shimisning ishxanisi bu heqte yazma bayanat élan qilip: “Xitay hökümiti wirus mesiliside dunyani aldidi. Shuning üchün ular bu qilmish sewebidin kélip chiqqan barliq aqiwetke jawabkar bolushi lazim,” dégen.

Xewerde éytilishiche, missuri shtatida hazirghiche 200 din artuq kishi wirustin yuqumlinip jan üzgen bolup, wirus yuqumdarliri alte mingdin ashidiken. Beziler missuri shtatining mushu qétimliq wirus wabasida uchrighan ziyinini az dégendimu 44 milyard amérika dolliri etrapida, dep mölcherlimekte iken.

“Muhapizetchi” gézitining 20-apréldiki xewiride éytilishiche, amérikadiki wirus yuqumi eng éghir bolghan nyu-york shtatidiki üch wilayetning ahalisi shu küni dunya sehiye teshkilati üstidin erz sun'ghan. Erznamide ular dunya sehiye teshkilatini “Wirusning xewpige sel qarighan hemde bu heqte toghra melumat bérelmigen,” dep eyibligen.